​Черёмушкын зониие саг соонь гэртэй болгохо

Ородой Юрэнхылэгшын Сибириин тойрогтохи Бүрин эрхэтэ түлөөлэгшэ Сергей Меняйло үнгэрэгшэ долооной эсэстэ Буряад орон руу морилоод, энэ хабартаа гайтай ехэ галай аюулда орожо хохидоһон Байгал шадарай аймагай Черёмушки тосхон хүрэхэдөө, тэндэ хэгдэжэ байһан барилга хаража, хэр зэргэ шанартайгаар, саг болзор соогоо энэ ехэ ажалай ябуулагдажа байһан үгые шалгаба.

Үндэр зиндаатын үгэ 

Үндэр зиндаатай даргын хүрэжэ ерэхэдэ, барилгашадай хэһэн ажалай дүнгүүд яһала һайн байгаа. Түймэртэ хохидогшодой шэнэ гэрнүүдэй хананууд бодхоогдонхой, хушагданхай шахуу. Юрэнхылэгшын түлөөлэгшын хэлэһээр, шатаһан гэрнүүдые дахинаа бариха ажал Буряад Уласта яһала эршэтэйгээр ябуулагдана. Эмхидхэл һайтай энэ хэрэг хоёр нюдөөрөө харабаб гэжэ Сергей Меняйло онсолон тэмдэглээ. Тиимэһээ гүрэнэй толгойлогшын даабари саг соогоо дүүргэгдэжэ, түймэрэй үедэ эд зөөри, байрагүй үлэһэн хүн бүхэн гэртэй болохо ёһотой гээд тэрэ хэлээ юм. 

Хэрэгтэй туһаламжа 19 айлда үзүүлэгдэнхэй. Ондоо тээшээ нүүжэ ошохо дуратай дүрбэн айлда мүнгэн үгтөөд байна. Шатаһан гэрнүүдэй орондо Черёмушки тосхондо мүнөө 15 шэнэ гэр бодхоогдоо. Эдэ үдэрнүүдтэ сонхонуудынь һуулгагдажа, һаруул байшан гэрнүүдые досоо талаһаань һэльбэхэ, шэрдэхэ, сагаадаха ажал үлэнхэй. Барилгын бүхы ажалнууд сентябриин нэгэндэ дүүргэгдэхээр хараалагдана. 

Баян сэдьхэлтэй Буряадай зон 

Буряад Уласай Толгойлогшын уялга дүүргэгшэ Алексей Цыденовэй хэлэһээр, манай нютагаархин Черёмушкын ажаһуугшадай иимэ аюулда ороходо, нигүүлэсхы һайхан сэдьхэлэй уряагаар туһа хүргэхэеэ тон түргөөр оролдоо. Ниислэл хотоһоо эдэбхитэд сугларжа, түймэрэй һүүлдэ үлэһэн бог шорой дүрбэн үдэрэй туршада һайн дураараа дууһан арилгахадань, май һарын 6-да энэ ажалай эсэс харагдаа бэлэй. Хахад һараһаа бага болзор соо тосхоной гудамжанууд сэбэрлэгдээ бшуу. 

Гэхэтэй хамта, галай аюулда хохидоһон зондо Буряад ороной ажаһуугшад 1 сая 600 мянга гаран түхэриг мүнгэ суглуулжа дамжуулаа. Энээн тухай сомоной дарга Оксана Тришкина мэдээсэһэн байна. Сугларһан мүнгэеэ ехэ зүбөөр, гомдолгүйгөөр черёмушкынхид хубаагаа: эгээл ехээр хохидогшодтоо ехэшэгээр, ээлэһэн бусадтаа – багашагаар.

Эбээн тэдхэгшэд һайн дураараа мүнгэн туһаламжа зондо үзүүлхын хажуугаар гэр байрануудай барилгадашье хандиб оруулаа. 

Алексей Цыденовэй хэлэһээр, һэльбэн шэнэлэгдэжэ байгаа тосхондо соёлой байшан дахинаа баригдаха. Тэрэ мүнөө бэлэн шахуу болонхой. Хүүгэд болон залуушуулай сүлөө сагаа үнгэргэдэг байһан соёлой гуламта зондоо заатагүй бусаагдаха ёһотой.

- Байшан мүнөө бэлэн болонхой, ажалнууд дүүрэнтэжэ байна. Түрүүшын айлшад ерэжэ үрдеэ, - гээд, Буряадай Толгойлогшын уялга дүүргэгшэ тэмдэглээ. 

Дээдын хиналта 

Черёмушки тосхондо болоһон түймэрэй һүүлдэ тэрээнһээ хохидогшодто туһаламжа үзүүлхэ болон гэр байрыень шэнээр барюулжа туһалха хэрэгые Ородой Холбоото Уласай Юрэнхылэгшэ Владимир Путин өөрынгөө хубиин хиналта доро абаһан юм. Барилгыень өөрөө ерэжэ харахаб гээ һэн. Буряад Уласай засагай зургаануудта энэ ажалай талаар хамаг туһаламжа үзүүлхыень гүрэн түрын засагай дээдын зургаануудые юрэнхылэгшэ уялгалһан юм.