752
2017 оной августын 2-то Буряад Уласай Толгойлогшын уялгануудые дүүргэгшэ Алексей Цыденов болон хизаарламал харюусалгатай “Интер РАО – Управление электрогенерацией” бүлгэмэй захирал Тимур Липатов гэгшэд ниигэмэй-эдэй засагай һалбарида суг ажалаа ябуулха тухай хэлсээ баталба.
“Бидэ мүнөөдэр түүхэтэ хэлсээ баталбабди. Тэрэнэй ашаар Буряад Уласай ниигэмэй-эдэй засагай хүгжэлтэдэ “Интер РАО – Электрогенерация” бүлгэм нягта холбоотой байха”, - гэжэ Алексей Цыденов хэлэбэ.
Хуби ниилүүлһэн “Интер РАО – Электрогенерация” бүлгэм Буряад Уласта таһалгаряагүйгөөр зайн галаар хангаха юм. Тиихэдэ Буряад Уласай Засагай газар тус эмхиин үзүүлһэн туһаламжын түлөө түлбэри саг соогоо түлэгдэжэ байха талаар туһаламжа үзүүлхэ.
“Буряад Уласай ажаһуугшад болон эмхи зургаануудта таһалгаряагүйгөөр зайн гал дамжуулхабди. Энэ үйлэдбэри болон хүдөө ажахын һалбариин хүгжэлтэдэ нүлөөлхэ юм. Тиихэдэ уласай болон нютагай бюджедтэ татабаришье тогтууритай орожо байха”, - гэжэ Тимур Липатов тэмдэглэбэ.
Хуби ниилүүлһэн “Интер РАО – Электрогенерация” бүлгэм хуби ниилүүлһэн нээмэл “Интер РАО” бүлгэмэй бүридэлдэ хабаатай. Тэрэнэй бүридэлдэ Ородой Холбоото Уласай эгээл томо 18 электростанцинууд ородог юм. Буряад Уласта “Гусиноозёрскын ГРЭС” энэ компани түлөөлдэг юм. Сэлэнгэ аймагай Гусиноозёрск хотодо оршодог зайн галай станци Үбэр Байгалай үдхэрүүлдэг оньһотой болон Буряад Уласай эгээл томо үйлэдбэринүүдэй нэгэн. Энэ станциин хүсөөр Буряад Уласай болон хүршэ можонуудай ажаһуугшад болон эмхи зургаанууд зайн галаар хангагдадаг юм. Тиихэдэ 24 мянганһаа дээшэ ажаһуугшадтай Гусиноозёрск хото дулаагаар хангадаг.
