1001
Ородой Холбоото Уласай Юрэнхылэгшэ Владимир Путин Кабанск аймагай Танхой һууринай Байгалай дархан газар албанай хэрэгээр ерэбэ.
Гүрэнэй хүтэлбэрилэгшэ визит-түбтэ дэлгэгдэһэн үзэсхэлэн хаража, омолиин жараахайнуудые Байгалда табиха хэмжээ ябуулгада хабаадалсаһан байна. Удаань Владимир Путин Байгал далай аршалха тухай зүблөө үнгэргэжэ, ойн түймэрэй, байгаалиин аюулнуудай хойшолонгуудые усадхаха талаар асуудалнуудаар зүбшэн хэлсэхэ юм.
Ородой Холбоото Уласай Засагай газарай Түрүүлэгшын орлогшо Александр Хлопонин, эдэй засагай асуудалнуудаар Юрэнхылэгшын туһалагша Андрей Белоусов, Байгаалиин нөөсэнүүдэй болон байгаали хамгаалгын сайд Сергей Донской, Барилгын болон гэр байрын ажахын сайд Михаил Мень, Эдэй засагай хүгжэлтын сайд Максим Орешкин, Эрхэтэдые хамгаалгын болон онсо байдалай талаар сайд Владимир Пучков гэгшэд зүблөөндэ хабаадаха юм.
Байгал шадарай аймагай Черёмушки һууринда 2017 оной апрелиин 28-да түймэр һүжэржэ, хүнүүд байрлаха гэргүй үлэһэн байна гэжэ һануулнабди. Черёмушки һууринда гэрнүүдые шэнээр барилгын ажалнууд июнь һарада эхилһэн байна. Сентябриин 1 болотор ажаһуугшад гэртээ орохо юм. Черёмушки һууринай ажаһуугшадтай Владимир Путин видео-конференц холбоогоор харилсаха гэжэ багсаамжалагдана.
