691
Буряад Уласай Толгойлогшын уялгануудые дүүргэгшэ Алексей Цыденов албанай хэрэгээр Хяагта аймаг мүнөөдэр гараба.
Алексей Цыденов Хяагта аймагай ажаһуугшадтай уулзажа, тэдэнэй асуудалнуудта харюусаһан байна. Энхэ-Талын ажаһуугшад эдихэ, ууха уһанай бага болоһон тухай хэлэбэ. Тиимэһээ тэдэнэр үмсэдөө худаг малтаха баатай болоно, теэд үсөөхэн лэ айлнууд худагтай болоһон байна. Энхэ-Талын ажаһуугша Ардан Аюшеевэй хэлэһээр, аймагай захиргаан уласай Хүдөө ажахын болон эдеэ хоолой, Байгаалиин нөөсэнүүдэй яаманай түлөөлэгшэдтэй хамта уһанай сөөрэмүүдые шэнжэлһэн байна. Хэдэн жэлэй туршада улас дотор саһа, бороо багатай уларил тогтоһоной шалтагаанһаа болоно гэжэ тэдэнэр согсолһон байна.Буряадта һүүлэй жэлнүүдтэ олон гол горхонууд хатаа гэжэ Байгаалиин нөөсэнүүдэй сайд Юрий Сафьянов тэмдэглэбэ.
Энэ асуудалаар зүбшэн хэлсэжэ, зохихо шиидхэбэринүүдые абаха тухай Байгаалиин нөөсэнүүдэй яаманда даабари Алексей Цыденов үгэбэ. Тиихэдэ Наушки һууринай ажаһуугшад түлеэгээр хангалгын талаар ажал гуримшуулха тухай уласай хүтэлбэрилэгшэдэ хэлэһэн байна. Энэ асуудалаар Байгаалиин нөөсэнүүдэй сайд Юрий Сафьяновай хэлэһээр, энэ һалбарида мэргэжэлтэд дуталдана, теэд уласай Ажалаар хангадаг агентство энэ асуудал шиидхэхэ. Хүйтэн болотор хүнүүд түлеэтэй болоод байхаар энэ асуудал шиидхэбэри абаха тухай Алексей Цыденов тэмдэглэбэ.
Тиихэдэ Наушки-Улаан-Үдэ гэһэн хото шадарай поезд ябуулха, интернет холбоогүй байһан тухайгаа Наушки һууринай ажаһуугшад хэлэбэ. Түрүүшын асуудалаар хизаарламал харюусалгатай “РЖД” бүлгэмтэй энэ талаар ехэ ажал ябуулагдаха һаань, хоёрдохи асуудалаар энэл бүлгэмтэй хэлсэгдэбэ.
“Танай эндэ “Транстелеком” бүлгэмэй татаһан оптиковолокно ерэнхэй ха юм. Хизаарламал харюусалгатай “РЖД” бүлгэмэй пунктнуудта интернет бии.Тэрээндэ хамжаха арга байха гү?” – гэжэ Буряад Уласай Транспортын, элшэ хүсэнэй болон харгын ажахы хүгжөөлгын сайдай орлогшо Сергей Белоколодов болон түмэр замай түлөөлэгшэдтэ Алексей Цыденов хандаба. Энэ асуудалаар засаг зургаанай түлөөлэгшэд зохихо шиидхэбэри абаһан байна.
Баталан хамгаалгын яаманай мэдэлдэ байһан “Звёздочка” гэһэн хүүгэдэй сэсэрлиг аймагай мэдэлдэ оруулхагүй талаар ябуулагдаһан ажалда туһа хүргэһэн Алексей Цыденовтэ сэрэгэй алба хаагшадтай эмхидхэгдэһэн уулзалгада ажаһуугшад баяраа мэдүүлбэ. 2012 ондо энэ сэсэрлиг хаагдаха туйлдаа хүрэһэн байна гэжэ һануулнабди. 2016 оной хабар Арбитражна сүүдтэ аймагай захиргааниие энэ сэсэрлиг мэдэлдээ оруулха гэһэн шиидхэбэри абтаа. Теэд аймагай бюджедтэ сэсэрлиг хүрэхысэ хангаха мүнгэн үгы ха юм. Энэ шиидхэбэри хубилхагүй гү гэһэн асуудалда, Баталан хамгаалгын яаманай мэдэлдэ сэсэрлиг ходо байха гэжэ үгэеэ үгэнэгүйб, хубилалтанууд боложо магад, тиигээшье һаань, хүүгэдэй сэсэрлиг ажалаа ябуулһаар лэ байха гэжэ Алексей Цыденов хэлэбэ.
Үглөөдэр, августын 9-дэ Буряад Уласай Толгойлогшын уялгануудыве дүүргэгшэ Алексей Цыденов Бэшүүр аймагта ажалаа үргэлжэлүүлхэ гэжэ һануулнабди.
Анна Огороднигой гэрэл зураг.
