​Мэдээсэлэй бодолгые шэнэ дарга хүтэлхэ

Буряад Уласай Толгойлогшын уялгануудые дүүргэгшэ Алексей Цыденов өөрынгөө зарлигаар Ирина Доржиевае Буряад Уласай Толгойлогшын болон Засагай газарай Захиргаанай Хүтэлбэрилэгшын мэдээсэлэй бодолгын болон олониитэтэй холбоо харилсаануудай талаар орлогшоор – Мэдээсэлэй- шэнжэлэлгын хорооной түрүүлэгшээр энэ һарын эхинһээ томилбо. 

Ирина Доржиева Улаан-Үдэдэ түрэһэн юм. Москвагай гүрэнэй хэблэлэй ехэ һургуули “Ном хэблэхэ хэрэг болон эрхилэлгэ” гэһэн мэргэжэлээр 2008 ондо дүүргэһэн байха юм. 

Ородой Холбоото Уласай Юрэнхылэгшын дэргэдэхи Ородой гүрэнэй арадай ажахын болон гүрэнэй албанай академидэ һуралсалаа үргэлжэлүүлжэ, 2012 ондо эдэй засагай магистрай зиндаатай болоо.

2013 онһоо хойшо “Новости” гэһэн Ородой Мэдээсэлэй албанда мүнгэн һангай болон эдэй засагай сэдэбүүдые тайлбарилан бэшэдэг сурбалжалагшаар Ирина Доржиева ажалладаг байһан юм.

Бусад хэлэнүүдые мэдэхэһээ гадна, түрэлхи буряад хэлэн дээрээ тордиһогүйгөөр хэлэдэг шэнэ залуу хүтэлбэрилэгшын ажалдань амжалта хүсэе.