998
Буряад Уласай Толгойлогшын уялгануудые дүүргэгшэ мүнөөдэр, августын 14-дэ, Хурамхаан аймагай олзын хэрэг эрхилэгшэд, хүдөө ажахын һалбариин хүтэлбэрилэгшэд, ТОСуудай эдэбхитэд, болбосоролой, элүүрые хамгаалгын һалбариин хүдэлмэрилэгшэд болон ажаһуугшадтай уулзаха юм.
Үсэгэлдэр Баргажан аймагай захиргаанда сэбэрлэлгын түхерэлгын асуудалнуудаар Алексей Цыденов зүблөө үнгэргэһэн байна.
Мүнөөдэр Буряад Уласай Толгойлогшын уялгануудые дүүргэгшэ наһатайшуулай болон эрэмдэг бэетэй зоной Хурамхаанай интернат-байшан, айамагай түбэй больница хүрэжэ, ажалаа эхилхэ юм. Могойто тосхондо мяха үйлэдбэриин «Хурамхаан» болон гүрэнэй тэдхэмжэдэ хүртэдэг Бронислав Болдоновой мяха үүсэлэлгын цехүүдтэ уласай хүтэлбэрилэгшэ хүрэхэ түсэбтэй.
Байгалай аяншалгын болон туһа хүргэлгын колледждо хүдөө ажахын эмхинүүдэй хүтэлбэрилэгшэд болон олзын хэрэг эрхилэгшэд энэ һалбариин саашанхи хүгжэлтэ тухай зүбшэн хэлсэхэ. Удаань Барагхан тосхондо ТОСуудай эдэбхитэдэй Алексей Цыденов уулзаха юм. Буряад Уласай Толгойлогшын уялгануудые дүүргэгшэ Хурамхаанай 2-дохи һургуулида хүрэжэ, удаань тамирай-спортын байшанда залуушуулай нэгэдэлнүүдэй эдэбхитэд, тамиршадтай уулзажа, ниигэмэй удха шанартай залуушуулай бэелүүлдэг түсэлнүүдтэй танилсаха юм. Һүүлээрнь аймагай соёлой-сүлөө сагай түбтэ ажаһуугшадтай уулзалга эмхидхэгдэхэ.
Үглөөдэр Алексей Цыденов Баргажан аймагта ажалаа үргэлжэлүүлхэ юм.
Анна Огороднигой гэрэл зураг.
