935
Буряад Уласай Толгойлогшын уялгануудые дүүргэгшэ Алексей Цыденов мүнөөдэр Хурамхаан аймагта хүдөө ажахы эрхилэгшэдтэй уулзаба.
Һүүлэй хэдэн жэлэй туршада үзэгдэжэ байһан хуурай жэлнүүдһээ боложо, хүдөө ажахыда тэрэнэй хойшолон үзэгдэнэ гэжэ Хурамхаанай хүдөө ажахын түлөөлэгшэд һанаата болоһоноо тэмдэглэбэ. Тиихэдэ уһанай харууһатай газарташье, ойдошье хуули бусаар, хайра гамгүйгөөр модо отологшод гол горхонуудай хатахада зэмэтэй гэжэ уһалжа, газар һайжаруулха талаар хүтэлбэриин түлөөлэгшэд тэмдэглэнэ.
«Һүүлэй жэлнүүдтэ талха таряа муугаар ургажа, комбайнууднайшье полидо гаранагүй. Гүрэнэй тэдхэмжэ үзүүлэгдээгүй һаань, манай ажахынууд хосорхо байгаа. Байгша ондо яһала хура бороотой», - гэжэ фермернүүд хэлэнэ.
Буряад Уласай Толгойлогшын уялгануудые дүүргэгшэ Алексей Цыденовэй хэлэһээр, 2017 ондо хуурай уларилһаа хохидоһон ажахынуудта гүрэнэй тэдхэмжэ үзүлэгдэхээр түсэблэгдэнэ. Тиихэдэ улас дотор өөһэдөө бороо оруулха талаар ажал ябуулагдажа эхилһэн байна.
Талха таряа, сабшаланай ургасатай байхын тулада уһалжа, газар һайжаруулха талаар ажал ябуулха шухала гэжэ Хүдөө ажахын сайдай уялгануудые дүүргэгшэ Даба-Жалсан Чирипов хэлэбэ.
Буряад Уласай уһалжа, газар һайжаруулха талаар хүтэлбэриин ахамад инженер Андрей Понаморёвой хэлэһээр, Хурамхаан аймагта пооли уһалха гурбадахи оньһон түхеэрэлгэ баригдана. Уһанай харууһатай газарта модо отолхоёо болёогүй һаань, энэшье барилга аша үрэгүй.
Уһанай харууһатай газарта гансал ой арилгажа, модон отологдоно гэжэ Буряад Уласай Байгаалиин нөөсэнүүдэй сайдай орлогшо Марина Капустинагай хэлэхэдэ, Андрей Понаморев хуули бусаар, хайра гамгүйгөөр модон отологдоно гэһэн гэршэлгэнүүд бии гэжэ харюусаба.
Тэрэ гэршэлгэнүүдые суглуулжа, Байгаалиин нөөсэнүүдэй яаманда оруулха тухай Алексей Цыденов даалгаба.
Мүнөөдэр Буряад Уласай Толгойлогшын уялгануудые дүүргэгшэ Алексей Цыденов албанай хэрэгээр Хурамхаан аймаг гаранхай гэжэ һануулнабди. Тиихэдээ уласай хүтэлбэрилэгшэ наһатай зоной интернат, аймагай түбэй больница хүрэһэн байна.
