​Алексей Цыденов Баргажан аймагай ажаһуугшадтай уулзаба

Буряад Уласай Толгойлогшын уялгануудые дүүргэгшэ Алексей Цыденов Баргажан аймагай ажаһуугшадтай уулзаба.

Буряад Уласай бүхы аймагуудта эмшэд, багшанар, малай эмшэд дуталдана. Тиихэдэ Баргажан, Хурамхаан аймагуудта харгын асуудал шухала асуудалнуудай нэгэн юм.

- Баргажанай Дзержинского гудамжада оршодог гэртэ нёдондо ехэ заһабари хэгдэхэ тухай хэлэгдэһэн байна. Бидэ мүнгэеэ таһалдуулангүй,саг соонь түлэнэбди. Харин заһабарилга мүнөөшье болотор хэгдэнэгүй, - гэжэ тэрэ гэртэ ажаһуугша гомдоно.

Барилгын болон гэр байрын ажахы шэнэдхэлгын сайдай орлогшо Сергей Рыбальченко гэгшын хэлэһээр, байгша ондо заһабарилгын гарзын данса бэлэдхэхэ мүрысөөн эхилһэн байна, харин 2018 ондо гэр заһабарилагдаха.

- Арбан жэлэй туршада эрдэм болбосоролой һалбарида шэнэдхэлгэ үнгэргэгдэжэ, шиидхэхэ олон асуудалнууд гараһан байна. Тэдэнэй нэгэн залуу багшанарай дуталдал болоно. Манай һургуулинуудта багшанарай 60 хубинь 50-60 наһатай. Залуушуул хүдөө нютаг ерэхэеэ яаранагүй. Тэрэнь ойлгостой. Байха байрагүй, ипотекэ хэжэ, гэр худалдан абаха гэхэдэ, салин бага. Энэ асуудал шиидхэхэ шухала. “Земскэ эмшэн” гэһэн программада адлирхуу программа бэелүүлхээр бэшэ гү? – гэжэ багшанар уласай хүтэлбэрилэгшэдэ хандаба.

Буряад Уласай Толгойлогшын уялгануудые дүүргэгшэ Алексей Цыденовэй хэлэһээр, бүхы аймагуудта энэ асуудал шиидхэхэээр болоод байна.

- Залуу багшанар, тэдэнэй байха гэр, үсөөн һурагшадтай һургуулинуудта бага салин тухай асуудалнуудаар нютаг бүхэндэ хэлэгдэнэ. Гэр барижа орохыень, багшанар болон эмшэдые модоор хангаха тухай хуули бэлдэнэбди. Болбосоролой һалбарида бэлэн бэшэ байдал тохёолдонхой. Жэл бүри хоёр зуугаад залуу багшанар хэрэгтэй болоно. Буряадай гүрэнэй дээдэ һургуулида оройдоол 40 оюутад түлөөһэгүйгөөр һураха аргатай. Ородой Холбоото Уласай Болбосоролой яамантай хамта тэдэнэй тоо олон болгохо талаар ажал ябуулнабди. Мүнөө дээрээ дээдэ зургаанда түлөөһэгүйгөөр һураха оюутадай тоо арбаар олон болгохо тухай хэлсэгдэнэ. Энэ хадаа залуу багшанарай талаар асуудал шиидхэлгын түрүүшын алхам болоно, - гэжэ Алексей Цыденов хэлэбэ.

Буряад Уласай Толгойлогшын уялгануудые дүүргэгшэ Алексей Цыденов Баргажанай аймаг албанай хэрээгээр гаранхай гэжэ һануулнабди.

Буряад Уласай Засагай газарай сайтһаа гэрэл зураг абтаба.