877
Буряад Уласай Толгойлогшын уялга дүүргэгшэ Алексей Цыденов Ярууна аймагай ажаһуугшадтай уулзажа, хүдөө ажахын асуудалнуудаар хэлсэбэ.
Аймагай ажаһуугшадай хэлэһээр, үхэр мал үсөөрнэ, сабшалан дээгүүр һөөг бургааһан ургана, талха таряа тариха, хуряаха гэхэдэ, техникэшье хомор.
«Ажалшадтаа салингынь яажа түлэдэг тухайнь фермернүүдһээ асуухадам, эдеэлүүлээд, татаха тамхи абажа үгэдэгбди гэжэ харюусана. Иимэ хандалгатайгаар хүдөө ажахы хүгжэхэгүй. Зүүн Сибирьтэ анхан олон эвенкнүүд ажаһуудаг байгаа. Мүнөө болоходо, орошье үгы, эвенкнүүдшье үгы. Анхан газар хахалжа, талха таряа таридаг байгаа һаа, мүнөө поли дээрэ ногоон ургашоо. Би хахалха һэм, теэд намда хуушан «Беларус» тракторһаа ондоо техникэ үгы. Тэрээгээр олон юумэ хэхэгүйш», - гэжэ ажаһуугша хэлэнэ.
Сибириин үсөөн тоото үндэһэн арадууд тухай асуудал зүб эндэ табигдаба гэжэ уласай хүтэлбэрилэгшэ тэмдэглэбэ. Харин тэдэниие дэмжэхэ талаар тодо харюу үгэхөөр бэшэ. Харин хүдөө ажахы хүгжөөлгын һалбарида байдал тиимэ гэхээр бэшэ, уласай засаг зургаан энэ һалбари дэмжэхэ. Харин ороһон мүнгэеэ зүбөөр хубаарилха шухала гэжэ Алексей Цыденов хэлэбэ.
«Бидэ таанарта сая сая түхэриг мүнгэ үгөө һаамнай, бүхы асуудалнууд шиидхэгдэхэгүй. Сибириин үсөөн тоото арадууд урданайнгаа заншалаар ажаһууха ёһотой ха юм. Олоор үхэр малаа үсхэжэ, ехэ талмайда талха таряа ургуулбал хүдөө ажахы, мал үсхэбэрилгэ аша үрэтэй ха юм. Манай фермернүүд табяад лэ толгой малтай. Тиигэбэшье томо ажахын үгышье һаа, бага ажахынуудые дэмжэхэбди. Хүдөө ажахы хүгжөөлгэдэ мүнгэн туһаламжа үзүүлэгдэхэ», - гэжэ уласай хүтэлбэрилэгшэ хэлэбэ.
Удаань, олондо мэдээсэл тараадаг хэрэгсэлнүүдэй түлөөлэгшэдтэй Алексей Цыденов уулзахадаа, Ярууна аймагта хүдөө ажахын һалбари хүгжэхэ аргатай. Фермернүүд гүрэнэй тэдхэмжэ хүлеэжэ байнгүй, бата бэхи ажахынуудые байгуулдаг гэжэ тэмдэглэбэ.
Буряад Уласай Толгойлогшын уялга дүүргэгшэ Алексей Цыденов мүнөөдэр Ярууна аймаг албанай хэрэгээр гаранхай гэжэ һануулнабди.
