831
Буряад Уласай Толгойлогшын уялга дүүргэгшэ Алексей Цыденов аймагуудай ажабайдалтай танилсажа, тэрэнэй дүнгүүд тухай хэлэбэ.
Ажаһуугшадай табиһан асуудалнуудай ехэнхинь шиидхэгдээ гэжэ уласай хүтэлбэрилэгшын тэмдэглэбэ. Хүүгэдэй сэсэрлигүүдэй талаар асуудалнууд шиидхэгдэхэ, юундэб гэхэдэ хубиин сэсэрлигүүд гүрэнэй тэдхэмжэдэ хүртэжэ, түрэлхидэй түлбэри бага болохо юм.
«Аймагуудаар ябахадаа, ажаһуугшадһаа олон асуудалнууд ороһон байна. Нэрлэбэл, зайн галай түлөө түлбэри, авиа дамжуулга гэхэ мэтэ болоно. Тиихэдэ харгын барилгын программа дахинаа харанабди. Хубиин хүүгэдэй сэсэрлигүүдые дэмжэхэ тухай шиидхэбэри Засагай газарта абтаһан байна. Лицензитэй, болбосоролой программатай хүүгэдэй сэсэрлигүүдтэ үхибүүн бүхэнэй түлөө засаг зургаан 5800 түхэриг, миин үхибүүдые хараад байдаг сэсэрлигүүдтэ 3000 түхэриг мүнгэн түлэгдэхэ», - гэжэ Алексей Цыденов хэлэбэ.
Тиихэдэ Монгол гүрэндэ зайн гал дамжуулха тухай уласай хүтэлбэрилэгшэ Сэлэнгэ аймагаар албанай хэрэгээр ябахадаа хэлэһэн байна.
«Буряадһаа Монгол руу зайн гал дамжуулха талаар Монгол гүрэнэй түлөөлэгшэдтэй ажал ябуулнабди. Нэгэ доро хэдэн асуудалнууд шиидхэгдэхэ. Нэгэдэхеэр, Сэлэнгын эрьедэ зайн галай станци барилга аша үрэгүй болоно, хоёрдохёор, худалдаанай хэмжээ ехэ болгонобди, гурбадахяар зайн гал ехээр дамжуулагдаха, тэрэнэй түлбэри бага болохо. Энээнһээ уламжалан, Гусиноозёрскын зайн галай станции эршэтэйгээр хүдэлжэ, Сэлэнгэ аймагай шулуун нүүрһэнэй үйлэдбэри баһал дээшэлхэ. Байгаали хамгалгын хуули эбдэнгүй тэдэнэр ажалаа ябуулна ха юм», - гэжэ Алексей Цыденов хэлэбэ.
Анна Огороднигой гэрэл зураг.
