752
Буряад Уласай «Байкал» аэропорт «нээмэл огторгой» гэһэн нэрэ зэргэтэй болобо. Тэрэнэй ёһоор, уласхоорондын агаарай онгосонууд аэропортдо буужа, хүнүүдые, ашаа тээхэ аргатай болобо.
Энээн тухай мүнөөдэр, августын 30-да, Азиин авто харгынуудай һужаада автомашинаар уласхоорондын ашаа шэрэхэ тухай Засагай газарнуудай хоорондын хэлсээ бэелүүлгын бэлэдхэлэй семинарта Ородой Холбоото Уласай Транспортын сайд Максим Соколов хэлэбэ.
«Буряад Уласай авиа зам хүгжөөхэ талаар Ородой Холбоото Уласай Транспортын яаман иимэ шиидхэбэри абаһан байна. Азиин гүрэнүүдэй самолёдууд Улаан-Үдэдэ буужа, саашаа Европо хүрэтэр ниидэхэ аргатай. Тэрэнэй ашаар аяншалга хүгжэхэ болон мүнгэ һомологшод уласаар һонирхохо. Зүүн-Урда Азиин гүрэнүүдтэ болон Номгон далайн можо нютагта энэ мэдэсэл һонирхолтой байха», - гэжэ Максим Соколов хэлэбэ.
Буряад Уласай Толгойлогшын уялга дүүргэгшэ Алексей Цыденов федеральна эмхиин хүтэлбэрилэгшэдэ баяраа мэдүүлжэ, уласай транспортын оршон байдал, эдэй засагай болон аяншалгын һалбариин хүгжэлтэдэ алхам хэгдэбэ гэжэ тэмдэглэбэ.
Азиин авто харгынуудай һужаада автомашинаар уласхоорондын ашаа шэрэхэ тухай Засагай газарнуудай хоорондын хэлсээ бэелүүлгэдэ бэлэдхэлэй семинар Улаан-Үдэдэ августын 30-31-нэй үдэрнүүдтэ үнгэргэгдэхэ. Ородой Холбоото Уласай Транспортын сайд Максим Соколов, Буряад Уласай Толгойлогшын уялга дүүргэгшэ Алексей Цыденов, Монгол Уласай вице-министр Батчулуун Цогтгэрэл, Хитадай Транспортын сайдай орлогшо Сяомин Ли, ЭСКАТО транспортын таһагай захирал Ювэй Ли гэгшэд энэ хэмжээ ябуулгада хабаадана.
Тиихэдэ хэлсээ баталһан гүрэнүүд гүрэн доторой хэмжээ ябуулгануудай тогтоһон байдал тухай хэлсэжэ, тэрэнь хуулиин хүсэндэ орохо юм. Хитадай, Монголой болон Ородой Холбоото Уласай АН3 болон АН4 харгынуудай справочник бэлдэхэ талаар, хангалгын байгууламжа хүгжөөхэ, хилэ гарахадаа, хэрэгтэй дансанууд, эрилтэнүүд тухай гүрэнүүдэй түлөөлэшэд зүбшэхэ.
Анна Огороднигой гэрэл зураг.
