791
Ородой Холбоото Уласай Транспортын сайд Максим Соколов «Байкал» аэропортын ниидэлгэ-буулгын зуруудай барилга сэгнэбэ.
Мүнөөдэр, августын 30-да, Ородой Холбоото Уласай Транспортын сайд Максим Соколов Улаан-Үдын «Байкал» аэропортло баригдажа байһан ниидэлгэ-буулгын зурууд хаража, һайн сэгнэлтэ үгэбэ. Тиигэбэшье ажалнууд хэгдэхэ болзорһоонь хойнотоно, хүдэлмэришэд эршэтэйгээр хүдэлбэл, болзортоо ажалаа дүүргэхэ гэжэ үндэр сайд тэмдэглэбэ.
Хүйтэн уларилай тогтоодүйдэ, технологиин эрилтэнүүдтэ тааруугаар ажал хэгдэнэ гү, аэропортын хангалгын байгууламжа удаадахи аяншалгын хаһада бэлэн гү гэжэ федеральна засаг зургаанай хүтэлбэрилэгшэ аэропорто шалгалта үнгэргэбэ.
«Байгша ондо бэлэдхэлэй ажал үнгэргэһэн байнабди. Газарай гэдэһэн хойно ниидэлгэ-буулгын зуруудай барилга бүхы эрилтэнүүдтэ тааруугаар эхилээбди», - гэжэ аэропортын захиралнуудай эблэлэй гэшүүн Баир Цыренов хэлэбэ.
2017 оной октябриин нэгэн болотор бетон зуруудай барилга дүүрэхэ ёһотой, 2018 оной июниин нэгэн болотор ниидэлгэ-буулгын зурууд ашаглалгада тушаагдаха юм.
«Таанар ажалаа эршэтэйгээр ябуулжа, болзортоо дүүргэхэт. Хойто жэл шэнэ терминал бариха, аэропорт бүхыдэнь болбосон түхэлтэй болгохо зорилго табихабди. Бэрхэнүүдта», – гэжэ Максим Соколов тэмдэглэбэ.
Буряад Уласта аэропортдо ниидэлгэ-буулгын зурууд бариха тухай удаан сагта хэлсэгдээ, юундэб гэхэдэ, байһан зурууд техническэ эрилтэнүүдтэ таарадаггүй байгаа. Тиимэһээ энэ зурууд барилга «2018 он болотор Алас Дурна зүгэй болон Байгалай можын эдэй засагай болон ниигэмэй хүгжэлтэ» гэһэн федеральна программада оруулагдаа. Энэ түсэл бэелүүлгэдэ 4 миллиард тухай мүнгэн гаргашалагдаха. Шэнэ ниидэлгэ-буулгын зуруудай утань дүрбэн модо тухай, үргэниинь 45 метр байха юм. Тэрэнэй барилга стандартнуудта тааруугаар хэгдэнэ, бүхы түхэлэй самолёдууд эндэ бууха аргатай болохо.
Буряад Уласта «Аюулгүй, һайн шанартай харгынууд» гэһэн түсэлөөр үнгэргэгдэхэ зүблөөндэ болон Азиин авто харгынуудай һужаада автомашинаар уласхоорондын ашаа шэрэхэ тухай Засагай газарнуудай хоорондын хэлсээ бэелүүлгын бэлэдхэлэй семинарта Ородой Холбоото Уласай Транспортын сайд Максим Соколов хабаадаха.
Анна Огороднигой гэрэл зурагууд.
