823
Ородой Холбоото Уласай Онсо байдалай талаар яаманай хүтэлбэрилэгшэ Владимир Пучков үсэгэлдэр Буряад Улас ерэбэ.
Тэрэ Буряад Уласай Толгойлогшын уялга дүүргэгшэ Алексей Цыденовтэй хамта Байгал шадарай аймагай Черёмушки һуурин хүрэжэ, ажаһуугшадтайнь уулзаба.
«Мүнөө ехэ баяр баясхалантай байнаб. Ородой Холбоото Уласай Юрэнхылэгшын даабаряар шиидхэбэринүүд абтажа, Ород гүрэнэй нөсын жасаһаа гэр байраяа гал аюулда алдаһан хүнүүдтэ туһа хүргэлгэдэ мүнгэн һомологдоо. Ажаһуугшадые гэр байратай болгохо, тэдэнэртэ тэдхэмжэ үзүүлхэ талаар асуудалнууд түргэн шиидхэгдээ. Эдэ талаар абтаһан шиидхэбэринүүд үндэр хэмжээндэ бэелүүлэгдэбэ», -гэжэ Владимир Пучков хэлэбэ.
Апрель һарада Черёмушки һууринай ажаһуугшад ехэ шахардуу байдалда ороод байһыень һананаб гэжэ тэрэ тэмдэглэбэ.
«Түймэрэй һүүлдэ уйдхар гашуудалда абтаһан хүнүүд, мүнөө баяртай. Уласай болон аймагай засаг зургаан иимэ харюусалгатайгаар энэ талаар асуудал шиидхэһэндэнь урмашанаб», - гэжэ Владимир Пучков хэлэбэ.
Һууринай шэнээр барилгада зүбөөр шиидхэбэринүүд абтажа, түргөөр, һайн шанартайгаар ажалнууд хэгдэбэ гэжэ Буряад Уласай Толгойлогшын уялга дүүргэгшэ тэмдэглэбэ. Тэрэнэй хэлэһээр, гэр байраяа алдаһан, уйдхарта дарагдаһан Черёмушки һууринай ажаһуугшадта һайн дураараа туһа хүргэһэн хүнүүд олон юм.
«Ородой Холбоото Уласай Юрэнхылэгшын Буряад Улас ерэхэдэ, нормативна баазада хубилалтануудые оруулха тухай шиидхэбэринүүд абтаа. Тэрэнэй ёһоор, түбэй байгаали хамгаалгын газарта һуурин, тосхонуудые ойн түймэрһөө аршалха талаар һэргылэмжын ажалнууд үнгэргэгдэхэ юм», - гэжэ Алексей Цыденов хэлэбэ.
Энээнһээ урид Буряад Уласай Засагай газарай Түрүүлэгшын аюулгүй байдал сахиха талаар орлогшо Пётр Мордовской шэнээр баригдаһан гэрнүүдые шалгаһан байна гэжэ һануулнабди.
Буряад Уласай Засагай газарай сайтһаа гэрэл зураг абтаба.
