723
Мүнөөдэр, 2017 оной сентябриин 10-най үдэр, Ородой Холбоото Уласта хуулиин ёһоор тогтоогдоһон һунгалтын ниитэ нэгэн үдэр Буряад Уласаймнай Толгойлогшын һунгалта эхилбэ.
Үглөөнэй 8 сагта улас доторнай байгуулагдаһан һунгуулиин 839 участогууд булта үүдэеэ сэлижэ, һунгагшадые угтан абажа эхилбэд. Буряад Уласай Һунгуулиин комиссиин мэдээсэһээр, манай уласта энэ жэлэй эхинэй тоогоор дүн хамта 715 мянга 422 һунгагша бүридхэлдэ абтанхай юм. Эгээл олон, аяар 293 мянга 524 һунгагшатай нютагай засагай байгууламжа – ниислэл хото Улаан-Үдэмнай. Харин эгээл үсөөн һунгагшадтай нютагай засагай байгууламжа хадаа – уласаймнай баруун урда захада, Саяан хадын хабшал соогуур оршодог Аха аймаг болоно гээшэ. Тэндэ оройдоол 3790 һунгагша бүридхэлдэ абтажа, тусхай тобьёгто оруулагдаһан байха юм. Һунгагшадай тоо харуулһан мэдээнүүдтэй тобьёг доро үгтэнэ.
“Буряад үнэн” Хэблэлэй байшан энэ һунгалтын үедэ бүхэли үдэрөө гүрэнэй хоёр – буряад болон ород – хэлэнүүд дээрэ сэхэ дамжуулга www.burunen.ru сайт дээрээ үнгэргэхэнь. Һунгуулиин участогуудта һунгагшад хэр эдэбхитэйгээр ерэжэ һунганаб, хуули хазагайруулгын ушарнууд бүридхэлдэ абтана гү гэхэ мэтын болон бусад олон һонинуудые манай сурбалжалагшадай түрэг шуумгай бэлдэһэн репортаж болон мэдээсэлнүүд сооһоо дуулахат. Тиимэ ушарһаа анахаралтайгаар хаража, уншажа байхыетнай уряалнабди. “Үнэнэй” сайт дээрэ гансал үнэн зүб мэдээсэл олохот.
Буряад Уласай газар дэбисхэр дээрэ бүридхэлдэ абтаһан һунгагшадай болон референдумдэ хабаадагшадай тоо тухай
МЭДЭЭНҮҮД
2017 оной январиин 1-нэй байдалаар
| Дугаар | Нютагай засагай байгууламжын нэрэ | Һунгагшадай болон референдумдэ хабаадагшадай тоо |
| 1. | Северобайкальск хото | 17797 |
| 2. | Улаан-Үдэ хото, Түмэр замай хороо | 101526 |
| 3. | Улаан-Үдэ хото, Октябриин хороо | 132827 |
| 4. | Улаан-Үдэ хото, Зүблэлтэ хороо | 59171 |
| 5. | Баргажан аймаг | 18592 |
| 6. | Бабантын хамниган аймаг | 7323 |
| 7. | Бэшүүр аймаг | 18289 |
| 8. | Зэдэ аймаг | 20509 |
| 9. | Ярууна аймаг | 11758 |
| 10. | Загарай аймаг | 39136 |
| 11. | Захаамин аймаг | 19152 |
| 12. | Ивалга аймаг | 33713 |
| 13. | Кабанскын аймаг | 45627 |
| 14. | Хэжэнгэ аймаг | 13252 |
| 15. | Хурамхаан аймаг | 11711 |
| 16. | Хяагта аймаг | 28128 |
| 17. | Муяын аймаг | 9027 |
| 18. | Мухар-Шэбэр аймаг | 18765 |
| 19. | Аха аймаг | 3790 |
| 20. | Байгал шадарай аймаг | 20708 |
| 21. | Хойто Байгалай аймаг | 10965 |
| 22. | Сэлэнгэ аймаг | 30784 |
| 23. | Тарбагатай аймаг | 13691 |
| 24. | Түнхэн аймаг | 15258 |
| 25. | Хори аймаг | 13923 |
| Хамтадаа: | 715422 |
Автор: Василий ЦЫБИКОВ
