921
Буряад Уласай Толгойлогшо Алексей Цыденов Буряад Уласһаа Федерациин Зүблэлэй сенаторой тушаалда Вячеслав Наговицыниие томилһон тухай тогтоол сентябриин 23-да абаба.
Федерациин Зүблэлэй байгуулагдаха гуримай ёһоор, уласай хүтэлбэрилэгшэ Алексей Цыденов тушаал эзэлһэн ёһололой удаа нэгэ хоногһоо хойно бэшэ болзорто сенаторые томилхо ёһотой юм.
Вячеслав Наговицын Буряад Улас 2007 онһоо хойшо хүтэлбэрилөө. 2017 оной февралиин 7-до өөрын дураар тушаалһаа бууха тухай мэдүүлгэ Вячеслав Наговицын бэшэһэн байна гэжэ һануулнабди. Энэл үдэр Ородой Холбоото Уласай Юрэнхылэгшэ Владимир Путин Буряад Уласай Толгойлогшын уялга саг зуура дүүргэгшээр Алексей Цыденовые томилһон юм.
Рязань болон Новгород можонуудай хүтэлбэрилэгшэнэр байһан Олег Ковалёв болон Сергей Митин гэгшэд тэрэ можо нютагуудта һунгагдаһан шэнэ хүтэлбэрилэгшэнэрэй тогтоолоор баһал Федерациин Зүблэлэй сенаторнууд болобо гэжэ тэмдэглэлтэй.
Анна Огороднигой гэрэл зураг.
