873
Буряад Уласай Толгойлогшо Алексей Цыденов мүнөөдэр, сентябриин 25-да, Буряад Уласай Засагай газарта болохо хубилалтанууд тухай шиидхэбэри абаба. Һаяын үдэрнүүдтэ энээн тухай тогтоол абтаха юм.
Буряад Уласай Засагай газарай Түрүүлэгшын орлогшо, Буряад Уласай Толгойлогшын болон Засагай газарай захиргаанай хүтэлбэрилэгшэ Пётр Носков болон Буряад Уласай Эдэй засагай сайдай уялгануудые дүүргэгшэ Зандра Сангадиев гэгшэд өөдынгөө дураар мэдүүлгэ бэшэжэ, тушаал сүлөөлбэд. Пётр Носков саашадаа уласай хүтэлбэрилэгшын зүблэгшэ, Зандра Сангадиев эдэй засагай хүгжэлтын талаар зүблэгшын тушаал эзэлхэ.
Буряад Уласай Засагай газарай Түрүүлэгшын орлогшын уялга саг зуура дүүргэгшэ, Ородой Холбоото Уласай Юрэнхылэгшын дэргэдэ Буряад Уласай этигэмжэтэ түлөөлэлгын хүтэлбэрилэгшэ Анатолий Лехатинов тушаал сүлөөлбэ. Тэрэнэй тушаалда Буряад Уласай Засагай газарай Түрүүлэгшын хангалгын байгууламжа хүгжөөхэ талаар орлогшын уялга дүүргэгшэ Мункожап Бадмаев томилогдохо. Буряад Уласай Элүүрые хамгаалгын сайдай уялга дүүргэгшэ Валерий Кожевников тушаалаа сүлөөлжэ, Мункожап Бадмаевай орлогшо болохо юм.
Тиихэдэ Буряад Уласай Спортын болон залуушуулай бодолгын талаар сайдай уялга дүүргэгшэ Баир Ангуров, Соёлой сайдай уялга дүүргэгшэ Тимур Цыбиков, Монголдо Буряад Уласай этигэмжэтэ түлөөлэлгын хүтэлбэрилэгшэ Сергей Будажапов гэгшэд тушаалаа сүлөөлхэ.
Иннокентий Егоровой орондо, Буряад Уласай Засагай газарай Түрүүлэгшын Нэгэдэхи орлогшын тушаалда Буряад Уласай Мүнгэн һангай яаманай хүтэлбэрилэгшын тушаал эзэлжэ байһан Игорь Шутенков томилогдохо. Буряад Уласай Засагай газарай Түрүүлэгшын ниигэмэй хүгжэлтын талаар орлогшын тушаалда Сэлэнгэ аймагай засаг дарга Вячеслав Цыбикжапов томилогдохо. Энэ тушаалда Владимир Матханов хүдэлжэ байгаа.
Буряад Уласай Засагай Түрүүлэгшын тушаалда томилогдоһон, уялга дүүргэгшэ хүнүүдэй зууршалагдаһан тухай Буряад Уласай Арадай Хуралда дамжуулха. Тиихэдэ Мүнгэн сангай, Эдэй засагай, Элүүрые хамгаалгын, Соёлой болон Аяншалгын яамануудай хүтэлбэрилэгшэд конкурсын дүнгүүдээр шэлэн абтаха юм.
Ородой Холбоото Уласай Юрэнхылэгшэ Владимир Путин сентябриин 10-да үнгэргэгдэһэн һунгалтын удаа можо нютагуудай хүтэлбэрилэгшэдтэй уулзахадаа, конкурсын дүнгүүдээр тушаалда томилхо тухай хэлэһэн байна гэжэ тэмдэглэлтэй. Алексей Цыденов баһал конкурс гаража, уласай хүтэлбэрилэгшын тушаалда томилогдоһон юм.
Анна Огороднигой гэрэл зураг.
