868
Буряад Уласай Толгойлогшо Алексей Цыденов Засагай газарай гэшүүдые тушаалһаа сүлөөлхэ, томилхо тухай тогтоол абаба.
Буряад Уласай Толгойлогшо Алексей Цыденов Буряад Уласай зургаан яамануудай хүтэлбэрилэгшэдые томилхо тухай тогтоол абаба. Энээнһээ урид тэдэнэр сайдай уялга дүүргэгшэ гээд хүдэлжэ байгаа. Нэрлэбэл, Маргарита Магомедова, Николай Рузавин, Татьяна Быкова, Алексей Мишенин, Сергей Козлов болон Юрий Сафьянов гэгшэд болоно.
Эдэнэр булта Буряад Уласай Толгойлогшын тушаал Вячеслав Наговицинай эзэлжэ байхада, яамануудай хүтэлбэрилэгшэнэр байгаа. Буряад Уласай «Буряад Уласай Толгойлогшо тухай» гэһэн хуулиин ёһоор «Буряад Уласай Толгойлогшын тушалһаа сүлөөлэгдэхэдэ, тэрэнэй хүтэлбэрилжэ байһан Засагай газар баһал тушаалһаа сүлөөлэгдэхэ гэжэ Ородой Холбоото Уласай Юрэнхылэгшын шиидхэбэреэр» Буряад Уласай Засагай газарай Түрүүлэгшын орлогшонор болон сайдууд тушаалһаа сүлөөлэгдөө. Тэдэнэр Буряад Уласай Толгойлогшын һунгалта болотор «уялга дүүргэгшэ» гээд хүдэлжэ байгаа.
Маргарита Магомедова - Буряад Уласай Зөөриин болон газарай харилсаанай талаар сайд, Юрий Сафьянов – Байгаалиин нөөсын сайд, Николай Рузавин - Барилгын болон гэр байрын ажахы шэнэдхэлгын сайд, Сергей Козлов - Транспортын, элшэ хүсэнэй болон харгын ажахы хүгжөөлгын сайд, Алексей Мишенин - Үйлэдбэриин болон худалдаа наймаанай сайд, Татьяна Быкова - Ниигэм хамгаалгын талаар сайдай тушаалнуудта дахинаа томилогдобо.
Буряад Уласай Болбосоролой болон эрдэм ухаанай сайдай уялга дүүргэгшэ Баир Жалсанов тухай Ородой Холбоото Уласай яаманда шиидхэбэри абтаха. Буряад Уласай Хүдөө ажахын болон эдеэ хоолой сайдай уялга дүүргэгшэ Даба-Жалсан Чирипов тухай Арадай Хуралда зүбшэн хэлсэгдэхэ.
Буряад Уласай Толгойлогшо Алексей Цыденов үсэгэлдэр Засагай газарай гэшүүдые тушаалһаа сүлөөлхэ тухай шиидхэбэри абаһан байна гэжэ һануулнабди. Тиихэдэ Эдэй засагай сайдай уялга дүүргэгшэ Зандра Сангадиев Буряад Уласай Толгойлогшын эдэй засагай хүгжэлтын талаар зүблэгшэ, Буряад Уласай Элүүрые хамгаалгын сайдай уялга дүүргэгшэ Валерий Кожевников Ородой Холбоото Уласай Юрэнхылэгшын дэргэдэ Буряад Уласай Бүрин эрхэтэ түлөөлгын толгойлогшын орлогшын тушаалда томилогдоо. Буряад Уласай Засагай газарай Түрүүлэгшын орлогшын тушаалда, Иннокентий Егоровой орондо, Буряад Уласай Мүнгэн һангай сайдай тушаалда хүдэлжэ байһан Игорь Шутенков томилогдобо. Буряад Уласай Мүнгэн һангай сайдай уялга дүүргэгшын тушаал Игорь Шутенковой орлогшоор хүдэлжэ байһан Всеволод Мухин эзэлбэ.
Буряад Уласай Спортын болон залуушуулай бодолгын талаар сайдай уялга дүүргэгшэ Баир Ангуров, Буряад Уласай Соёлой сайдай уялга дүүргэгшэ Тимур Цыбиков гэгшэд баһал тушаалһаа сүлөөлэгдэбэ. Тимур Цыбиков октябриин 2 болотор хүдэлхэ. Тиихэдэ Монгол гүрэндэ Буряад Уласай Түлөөлэлгын газарай хүтэлбэрилэгшэ Сергей Будажапов баһал тушаалһаа сүлөөлэгдэхэ.
Буряад Уласай Мүнгэн һангай, Эдэй засагай, Элүүрые хамгаалгын, Соёлой болон Эдэй засагай яаманай аяншалгын хороондо үндэһэлэн байгуулагдаха аяншалгын яаманай хүтэлбэрилэгшэдын шэлэн абалгын конкурс һаяын үдэрнүүдтэ соносхогдохо.
Анна Огороднигой гэрэл зураг.
