815
Мүнөөдэр, октябриин хоёрто, Пётр Носков Буряад Уласай Засагай газарай Түрүүлэгшын орлогшо, Толгойлогшын болон Засагай газарай захиргаанай хүтэлбэрилэгшын тушаалһаа сүлөөлэгдэжэ, Буряад Уласай Толгойлогшын зүблэгшын тушаалда томилогдобо.
Пётр Носков октябриин 3-да Буряад Уласай Толгойлогшын зүблэгшын тушааллда хүдэлжэ эхилхэ. Энээн тухай захирамжа Буряад Уласай Толгойлогшо Алексей Цыденов сентябриин 29-дэ абаһан байна.
Энээнһээ урид Алексей Цыденов Буряад Уласай Засагай газарта хубилалтануудые оруулһан байна гэжэ һануулнабди. Тиихэдэ Буряад Уласай зургаан яамануудай уялга дүүргэгшээр хүдэлжэ байһан хүтэлбэрилэгшэд томилогдоо. Нэрлэбэл, Маргарита Магомедова, Николай Рузавин, Татьяна Быкова, Алексей Мишенин, Сергей Козлов болон Юрий Сафьянов.
Мэдээсэл
Пётр Лукич Носков 1956 оной сентябриин 1-дэ Буряад АССР-эй Мухаршэбэрэй аймагай Шаралдай тосхондо түрэһэн юм. Тэрэ инженер-механик, экономист гэһэн мэргэжэлтэй. Буряадай гүрэнэй хүдөө ажахын дээдэ һургуули дүүргэһэнэй удаа Дээдэ Жэрэмэй дунда мэргэжэлэй хоёрдохи һургуулида Пётр Лукич багшалаа. 1979 онһоо 1991 он хүрэтэр Пётр Носков инжнерээр хүдэлөө, удаань Мухаршэбэрэй аймагай хүдөө ажахын техникын даргын орлогшоор, даргаар, «Авангард» совхозой захиралаар хүдэлһэн юм. 1992- 1997 онуудта Пётр Носков аймагай захиргаанай гүрэнэй зөөриин болон нютагай засагай байгууламжын ажахын хорооной түрүүлэгшээр хүдэлөө, 1997-2002 онуудта – Мухаршэбэрэй аймагай засаг даргаар, 2002-2005 онуудта – Буряад Уласай Байгаали ашаглалгын болон оршон тойронхиие хамгаалгын талаар хорооной түрүүлэгшээр хүдэлһэн юм. 2005 ондо тэрэ Буряад Уласай Байгаали нөөсэнүүдэй болон оршон тойронхиие хамгаалгын сайдай тушаалда томилогдоо.
Буряад Уласай Юрэнхылэгшын 2008 оной сентябриин 30-най 313 дугаар захирамжаар Пётр Носков Буряад Уласай Толгойлогшын болон Засагай газарай захиргаанай хүтэлбэрилэгшэ, Буряад Уласай Засагай газарай гэшүүнээр томилогдоһон юм.
Пётр Лукич хадаа Буряад Уласай газар үйлэдбэриин комплексын габьяата хүдэлмэрилэгшэ, Ородой Холбоото Уласай, Буряад Уласай Байгаалиин нөөсэнүүдэй яамануудай, Буряад Уласай Арадай Хуралай хүндэлэлэй грамотануудаар шагнагдаһан юм.
Анна Огороднигой гэрэл зураг.
