823
Мүнөөдэр, ноябриин 16-да, Буряад Уласай Загарай аймагта Үдэ гол дээгүүр шэнэ хүүргэ нээлгын баяр ёһолол үнгэргэгдэбэ.
Онохой болон Хуушан Онохой һууринуудые холбожо байһан хүүргэ үмхиржэ, машинаар ябахада аймшагтай болоһон байгаа. Үбэлэй сагта хүн зон мүльһэн дээгүүр ябадаг һэн. Зунай сагта «хүгжэмтэ» гэжэ ажаһуугшадай нэршэһэн хуушан хүүргэ машинануудай гарахада хииганажа, элдэб абяа гаргагша һэн. Ашаа шэрэһэн томо унаанууд зунай сагта нэгэ эрьеһээ нүгөө эрье хүрэтэр, Хуушан Онохой һууринай ажаһуугшадта эдеэ хоол гаргажа шадаха болишоходонь, энеэдэтэйшье юумэн үгы болоо.
Байгша ондо энэ хүүргэ барилгада 125 сая түхэриг һомологдоһон байна. Хүүргэ 1496 метр утатай. Буряад Уласай Толгойлогшо Алексей Цыденовэй хэлэһээр, хойто жэлдэ харгы барилгада ехэ анхарал хандуулагдаха.
- Загарай аймагта ганса хүүргэ баригдаа бэшэ, «Аюулгүй, һайн шанартай харгынууд» гэһэн түсэлөөр харгы заһабарилагдаһан байна. Энэ түсэлөөр хойто жэлдэ Загарай аймагта харгы заһабарилга үргэлжэлүүлэгдэхэ. Буряад Уласта бүхыдөө 200-гаад модоной зайда харгы заһабарилагдаха. Харгын шанар дээшэлүүлэгдэжэ, ажаһуугшад түргөөр, аюулгүйгөөр харгыда ябаха аргатай болоно. Эдэ бүхы ажал хэгдэхээр, - гэжэ тэрэ тэмдэглэбэ.
Буряад Уласай Толгойлогшо Алексей Цыденовэй хэлэһээр, Баргажан хүрэтэр харгы хэхэ гэжэ түсэблэгдэнэ, тиихэдэ Ярууна аймагта харгынуудые заһабарилха хэрэгтэй.
Баргажан аймагай ажаһуугшадтай уулзаха үедөө харгы хэгдэхэ гэжэ һайн мэдээсэл уласай хүтэлбэрилэгшэ дуулгаһан байна гэжэ һануулнабди. Усть-Баргажан хүрэтэр харгы хойто жэлдэ хэгдэхэ аргатай.
- Энэ хэрэгтэ мүнгэн һомологдонхой. Усть-Баргажан хүрэтэр харгы барилгада нэмэлтэ 300 сая мүнгэн май һарада һомологдоо, - гэжэ уласай хүтэлбэрилэгшэ хэлэбэ.
Буряад Уласай Транспортын, элшэ хүсэнэй болон харгын ажахын сайдай хэлэһээр, һайн шанартай харгы ганса жолоошод болон ажаһуугшадта аша үрэтэй бэшэ, харин энэ һалбарида хүдэлдэг эмхинүүд дэмжэгдэнэ ха юм.
- Энээнһээ урид харгы барилгын һалбарида хабаатай эмхинүүд мүнгэгүйһөө боложо, ажал ябуулдаггүй байгаа. Мүнөө «Аюулгүй, һайн шанартай харгынууд» гэһэн түсэлдэ хабаадажа, тэдэнэр техникэ болон хэрэгтэй юумэеэ худалдан абана. Ганса харга заһабарилагдана бэшэ, энэ һалбариин үйлэдбэринүүд хүгжэнэ, - гэжэ Сергей Козлов тэмдэглэбэ.
«Аюулгүй, һайн шанартай харгынууд» гэһэн Ородой Холбоото Уласай Юрэнхылэгшын түсэлөөр, Онохой һууринда зургаан гудамжада харгынууд заһабарилагдажа, ябаган харгынууд, харгын тэмдэгүүд шэнэлэгдэбэ. 4,7 модоной зайда харгы заһабарилгада 33 сая түхэриг мүнгэн һомологдоһон байна.
Анна Огороднигой гэрэл зурагууд.
