896
Үсэгэлдэр, декабриин 14-дэ, Ородой Холбоото Уласай Юрэнхылэгшэ Владимир Путинай ээлжээтэ 13-дахи пресс-конференци үнгэргэгдэбэ.
Ородой Холбоото Уласай олондо мэдээсэл тараадаг хэрэгсэлнүүдэй 1640 түлөөлэгшэд энэ хэмжээ ябуулгада хабаадаһан байна. Буряад Уласай олондо мэдээсэл тараадаг хэрэгсэлнүүдэй түлөөлэгшэд гүрэнэй хүтэлбэрилэгшэтэй хөөрэлдэжэ шадаһан байна. Тэдэнэр Байгал далай шадар тохёолдоһон байдалаар болон Улаан-Үдэдэ Үдэ гол дээгүүр хүүргэ бариха тухай Владимир Путинда хэлэбэ.
Буряадай гүрэнэй телевидениин сурбалжалагша Илья Кошлюнов Байгалда омоли загаһа бариха хорилто октябриин 1-һээ абтажа, тэндэхи ажаһуугшад ажалгүй болоо, уһа харууһалагын газарай талмай үргэдхэгдэһэн талаар тухай гүрэнэй хүтэлбэрилэгшэдэ мэдээсэбэ.
- Эндэ ажаллажа байһан хүнүүд ажалгүй болоо. Гүрэнэй талаһаа тэдэ зондо ажалгүй болоһон ушараар мүнгэн түлэгдэнэ, бэшэ туһаламажа үзүүлэгдэнэгүй, - гэжэ Илья Кошлюнов хэлэбэ.
- Байгаали хамгаалагдаха ёһотой, харин иижэ ажал ябуулха хэрэггүй. Загаһанай түрьһэ хорихо гэһэн ажал муугаар ябуулагдана, бүхы дэлгүүрнүүдтэ тэрэ наймалагдаһаар. Иимэл байдал омоли загаһанай асуудалаар. Тэрэнэй үсөөн болоһон һаа, хизаарлалтатай болгохо. Тиигэбэшье нэн түрүүн гэр бүлэеэ тэжээжэ байһан хүнүүд тухай бодожо үзэхэ шухала. Энэ асуудалда анхаралаа хандуулхаб , - гэжэ Владимир Путин тэмдэглэбэ.
Буряад Уласай түлөөлэгшэ, «Тивиком» телекомпаниин сурбалжалагша, Юлия Пермякова Байгал далай хамгаалха хуулинууд тэндэхи ажаһуугшадай ажабайдалда һаад ушаруулна гэжэ хэлэбэ.
«Байгал тухай хэлэхэдэ иимэ. Байгал далайн уһанай харууһалгын газарай талмай 200 метрһээ 80, зарим газарта 100 модон тухай ехэ болгогдоо. Тэндэхи ажаһуугшад гансата хуули хазагайруулагшад болоһон байна. Тэдэнэр газараа өөрынгөө мэдэлэй болгожо шаданагүй, гансал асфальттай харгыгаар ябаха болоно. Энэ талаар ажаһуугшад дүрбэн жэлэй туршада ажал ябуулна. Тэдэнэй нэгэ эдэбхитэн Ородой Холбоото Уласай Байгаалиин нөөсэнүүдэй сайд Сергй Донскойтой уулзаа. Тэрэнь ямаршье аша үрэгүй, мүнөө дээрээ энэ асуудал шиидхэхэ аргагүй. Энэ байдал Буряад Уласай дүрбэн аймагта тохёолдоо, 130 мянган ажаһуугшадай ажабайдалда һаад ушаруулагдаа. Энэ асуудал шиидхэхээр гү, тэрэниие шиидхэхэ талаар ажал ябуулхаар гү?», - гэжэ Юлия Пермякова Юрэнхылэгшэдэ хандаба.
Владимир Путин энэ асуудалда бусажа, тэрэниие шиидхэхэ талаар ажал ябуулха тухайгаа хэлэбэ. Юрэнхылэгшын һанамжаар, байгаали хамгаалха хэмжээнүүдые абахадаа, нэн түрүүн ажаһуугшадай ажабайдалда һаад ушаруулангүй ажал ябуулха хэрэгтэй.
Юлия Пермякова Улаан-Үдэ хото Буряад Уласай аяншалгын түб болоно, тиигэбэшье Үдэ гол дээгүүр гурбадахи хүүргэ баригдаха гэжэ 10 жэлэй туршада хүлеэгдэнэ. Тэрэнэй барилгада 4,5 миллиард түхэриг хэрэгтэй.
«Мүнөө Буряад Уласай Толгойлогшо һэлгэгдээ. Алексей Цыденов хүүргэ барилгада мүнгэ һомолхо арга бэдэрнэ, ехэ ажал ябуулна гэжэ мэдэнэт. Манай улас гүрэнэй тэдхэмжэдэ хүртэдэг. Буряад Уласай, хотын бюджедтэ иимэ мүнгэн үгы. Федеральна засаг зургаан энэ барилгада мүнгэ һомолхоор гү? Мүнгэн һомологдохо һаань, болзор табигдахаар гү?», - гэжэ Юлия Пермякова асууба.
- Иимэ барилганууд федеральна засаг зургаанай хабаадалгатай, үнгэргэгдэдэг, федеральна бюджетһээ мүнгэн һомологдодог. Буряад Уласай хүтэлбэрилэгшэтэй, Ородой Холбоото Уласай Транспортын сайдтай хөөрэлдэхэб. Тиихэдэ саг соогоо энээн тухай мэдүүлгэнүүдые бэшэжэ, транспортын хангалгын байгууламжа хүгжөөхэ түсэбтэ оруулха талаар ажал ябуулха хэрэгтэй. Би энэ асуудал хаража үзэхэб, - гэжэ Владимир Путин хэлэбэ.
Ородой Холбоото Уласай Юрэнхылэгшэдэ табиһан асуудалнуудай түлөө Буряад Уласай Толгойлогшо Алексей Цыденов интернет сүлжээндэ сурбалжалагшадта баяраа мэдүүлбэ.
«Байгал далай аршалха талаар абтаһан хуулинуудай ашаар тохёолдоһон байдал хубилгаха гэжэ эхилэгдэһэн ажал шухала болоод байна. Уласай олондо мэдээсэл тараадаг хэрэгсэлнүүд энэ асуудалда анхарал хандуулха арга боломжо алдаагүйнь һайшаалтай. Владимир Владимирович Буряад Улас ерэһэн үедөө, мүнөөшье Байгалай байгаали хамгаалгын онсо газарнуудые болон оршон хубилгаха гэһэн манай эдэбхи үүсхэл дэмжэһээр. Эдэ газарнуудта байгаали хамгаалгын хэмжээнүүд абтажа, байгаали хамгаалха эрилтэнүүд бэелүүлэгдэжэ, хүн зонойшье ажабайдалда һаад ушаруулагдангүй байхань шухала», - гэжэ Алексей Цыденов хэлэбэ.
Улаан-Үдэдэ гурбадахи хүүргэ бариха асуудалай түлөө уласай хүтэлбэрилэгшэ онсолон баяр хүргэбэ. Юрын хүнүүдэй табиһан асуудал саарһа ёһоной хандалгануудһаа аша үрэтэй байдаг гэжэ Буряад Уласай Толгойлогшо һанамжаараа хубаалдаба.
«Хүүргэ бариха талаар бидэ ажал ябуулнабди. Байгша ондо техническэ шиидхэбэринүүд болон хүүргэ ашаглалгын хэмжээнүүд абтаһан байна. Үнгэрһэн долоон хоногто Росавтодорой хүтэлбэрилэгшэтэй уулзажа, мүнгэ һомолхо асуудалаар хэлсээбди. Ородой Холбоото Уласай Юрэнхылэгшэ үнэн сэхэ, тодо хүн гэжэ тэмдэглэхэ хэрэгтэй!», - гэжэ Алексей Цыденов хэлэбэ.
Kremlin.ru сайтһаа гэрэл зураг абтаба.
