897
Буряад Уласай Толгойлогшо Алексей Цыденов үнгэргэгдэһэн түсэблэлгын суглаанда аймагуудай хүтэлбэрилэгшэдтэ дулаагаар хангалгын ажалнууд яажа ябуулагданаб, аймагуудта шулуун нүүрһэн сагтаа буулгагдана гэхэ мэтые үдэр үри шалгаха даабари үгэбэ.
Буряад Уласай Барилгын болон гэр байрын ажахын сайд Николай Рузавинай хэлэһээр, Улаан-Үдын болон уласай 14 аймагуудта 30 үдэрэй туршада хүрэхэ түлишэ бии гэжэ хэлэбэ. Хурамхаан аймагта – 70 үдэр, Бабанта аймагта – 67 үдэр, Хойто Байгалай аймагта 65 үдэрэй туршада хүрэхэ шулуу нүүрһэн буулгагданхай. Буряад Уласай 7 аймагта 15 үдэрһөө ехэ бэшэ болзорто хүрэхэ түлишэ бии. Кабанск аймагта 2016 тонно шулуун нүүрһэн бии, тэрэнь 14 үдэртэ хүрэхэ. Тиимэһээ аймагта түлишэ асарагдажа, тэрэнь 35 үдэрэй туршада түлэхөөр. Сэлэнгэ аймагай котельнинуудта 8 үдэртэ түлихөөр 315 тонно шулуун нүүрһэн бии. Үдэр бүри Окино-Ключевской шулуун нүүрһэнэй уурхайһаа түлишэ асарагдана. 41 үдэрэй туршада хүрэхэ 1760 тонно түлишэ үшөө тэндэһээ буулгагдаха. Байгал шадарай аймагта 23 үдэрэй туршада, Түнхэн аймагта 31 үдэрэй туршада хүрэхэ түлишэ бии гэжэ Николай Рузавин хэлэбэ.
Эгээл шахардуу байдал Северобайкальск хотодо, Захаамин болон Мууяын аймагуудта тохёолдонхой
«Шулуун нүүрһэнэй буулгагдаһаниие шалгаха ажал үдэр бүри, амаралтын үдэргүйгөөр хэгдэхэ ёһотой. Хаана түлишэ буулгахаб гэжэ мэдээжэ байха, Северобайкальск хотодо, Захаамин болон Мууяын аймагуудта хүрэхэ түлишэ бэлдэхэ талаар шиидхэбэринүүд абтаха ёһотой», - гэжэ Алексей Цыденов даабари үгэбэ.
Захаамин аймагта «РКЦ» нютагай эмхиин котельнинуудта 8 үдэр түлихэ 90 тонно шулуун нүүрһэн буулгагдаа. Тэндэ үдэр бүри 12 шулуун нүүрһэн түлэгдэхэ гэжэ баримталанхай. Буряад Уласай Толгойлогшын даабаряар, томо ашаанай машинануудаар үдэр бүри далаад тонно түлишэ асарагдана. Декабриин 30 болотор хүрэхэ түлишэ буулгагдаха.
Мууяын аймагта хизаарламал харюусалгатай «Икибзяк» бүлгэмэй ашагладаг котельнинуудта 12 үдэр дулаагаар хангаха 3087 тонно түлишэ бии. Северобайкальск хотодо 13 үдэр түлихэ 7406 тонно түлишэ бэлдэнхэй. Жэлэй дүүрэтэр эдэ котельнинуудта үшөө17 болон 22 үдэрнүүдтэ хүрэхэ шулуун нүүрһэн буулгагдаха.
