​«Алтан гадаһан» орденоор шагнагдаба

Январиин 18-да Монголой Юрэнхылэгшэ Халтмагийн Баттулга Буряад Уласай Толгойлогшо Алексей Цыденовые хүлеэн абажа, Монгол Ула­сай дээдэ шатын шагналаар – “Алтан гадаһан” орденоор шагнагдаһан ушараарнь амаршалаа. Тус шагнал Алексей Цыденовтэ хүршэ гүрэнэй юрэнхылэгшэтэй уулзахаһаань урид барюулагдаһан байгаа.

“Нэн түрүүн шагналаартнай таниие амаршалнаб, - гэжэ Х.Балттулга уулзал­гын эхиндэ хэлээ. – Һүүлэй жэлнүүдтэ гүрэнүүдэймнай арадуудай хоорондо­хи харилсаа холбоонууд, можо нютагууд хоорондын харилсаата ажал ябуулга һайжаржа байна. Тус шагнал хадаа унаа тээбэриин һалбарида харилсаа холбоо­нуудые һайжаруулха болон хүгжэлтын шэнэ шатада гаргаха талаар танай оролдолго үүсхэлыетнай хүндэлһэнэй тэмдэг болгон барюулагдаа гээшэ. Хоёр талын харилсаа холбоонуудые бэхижүүлхэ хэрэгтэтнай саашанхи ам­жалтануудые хүсэнэб.”

Буряад Уласай Толгойлогшо харюудань Монголой Юрэнхылэгшэдэ бая­рые хүргөө. Алексей Цыденов Ородой Холбоото Уласай ба Монгол Уласай хоо­рондохи харилсаанууд үндэр хэмжээн­дэ хүгжэнэ гэжэ тэмдэглээд, Монгол Бу­ряад оронуудай хоорондо бүри дүтэ харилсаа холбоонуудые хүгжөөхэ шухала гэжэ онсолоо. Гадна Монгол руу тогтомол сэнгээр зайн гал дамжуулжа байха хүсэлөө мэдүүлээ.

Уулзалгада хабаадагшад хоорон­дын тээбэридэ, аяншалгада хабаатай холбоонуудаа эдэбхижүүлхэ, можонууд хоорондын харилсаа холбоонуудые үргэдхэхэ тухай һанамжануудаа хэлээ.

“Иимэ хүндэтэй шагнал намда барюулһандань Монголой Юрэнхылэгшэдэ баяр баясхалангаа мэдүүлнэб. Энэ хадаа Улаан-Баатарай түмэр хар­гын хүтэлбэриин бүридэлдэ хэһэн ажалаймни сэгнэлтэ гээшэ. Минии һанахада, дан үндэр сэгнэлтэдэ хүртөөб. Гэбэшье, үшөө дахин баяр ба­ясхалангаа мэдүүлнэб”, - гэжэ Алексей Цыденов хэлээ.

«Буряад үнэн» мэдээсэлэй албан

Буряад Уласай Засагай газарай сайтһаа гэрэл зураг абтаба