756
2018 оной Буряад Уласай Арадай Хуралай түрүүшын зүблэлдэ үнгэрһэн жэлдэ хуули тогтоолгын талаар ябуулһан ажал тухай һунгамалнууд хэлсэбэ.
2017 ондо Арадай Хуралай 6 ээлжээтэ, 5 ээлжээтэ бэшэ сессинүүд үнгэргэгдэһэн байна. Эдэ сессинүүдтэ 152 хуулинууд абтаа. Уласай парламентын вице-спикер Владимир Павловай хэлэһээр, абтаһан хуулинуудай тоо түсэблэгдэһэнһөө дүрбэ дахин ехэ. Федеральна хуулида болоһон хубилтанууд, эдилгэ абаха ябадал усадхаха шиидхэбэринүүд, Буряад Уласай Толгойлогшын, Засагай газарай болон нютагай засагай байгууламжануудай хуулиин талаар оруулһан дурадхалнуудһаа боложо, хуулинууд абтаа.
«2017 оной туршада Арадай Хуралай хороонуудта 187 хуулинуудай түсэлөөр зүбшэн хэлсэгдээ. Тэдэнэй 18-ниинь дуудажа бусаагдаа, 13 түсэлөөр зүбшэгдэнэ, харин 4 хуули һунгамалнууд буруушаагаа. Ямар шалтагаанһаа хуулинууд буруушаагданаб гэхэдэ, тэдэнэр федеральна болон уласай хуулинуудта эсэргүүсэһэн гү, али мүнгэнэй дутагдалһаа болоно. Тиимэһээ оруулагдаһан дурадхалнуудай бэелүүлэгдэһэниинь 80 хубиһаа дээшэ болоно», - гэжэ Владимир Павлов хэлэбэ.
Хороонуудай болон фракцинуудай ажал
Үнгэрһэн жэлдэ Арадай Хуралай хороонууд болон комиссинуудта 180-һаа дээшэ суглаанууд, 17 «дүхэриг шэрээнүүд», тиихэдэ Буряад уласай бюджедтэ зорюулагдаһан олоной хабаадалгатай хоёр уншалганууд үнгэргэгдөө. Арадай Хуралда бодолгын намуудые түлөөлһэн фракцинууд ехэ ажал ябуулна, хуули абаха талаар эдэнэр хубитаяа оруулна гэжэ Владимир Павлов тэмдэглэбэ.
-«Ниитэ нэгэ Росси» намай фракци» өөрынгөө зүгһөө үнгэрһэн жэлдэ 66 хуулинуудые, бусад фракцинуудтай хамта 20 хуулинуудые оруулһан байна. Тэдэнэй 71 хуулинь абтаа. «Үнэн сэхэ Росси» намай фракци» бусад
фракцинуудтай хамта 12 хуули дурадхажа, тэдэниинь абтаһан байна. КПРФ намай һунгамалнууд 10 хуули болон бусад фракцинуудтай хамта 11 хуулинуудые оруулаа», - гэжэ Владимир Павлов тодорхойлбо.
Нютагай засагай байгууламжанууд болон аймагуудай һунгамалнуудай зүблэлнүүдтэй ажалаа суг ябуулаа
2017 оной эгээл шухала хэмжээ ябуулгануудай нэгэн хадаа Буряад Уласай Арадай Хуралай, аймагуудай зүблэлэй болон һомонуудай һунгамалнуудай дүрбэдэхи съезд болоно. Эндэ сугларагшад «Улас дотор нютагай өөһэдын хүтэлбэриин мүнөө үеын байдал болон тэрэнэй хүгжэлтын холын хараата түсэбүүд» гэһэн сэдэбээр зүбшэн хэлсээ. Һунгамалнуудай суглаанда Үбэр Байгалай хизаарай болон Монголой Сэлэнгэ аймагай түлөөлэгшэд хабаадалсаа.
«Уласай мүнгэн һангай хуулиин талаар уншалгануудта, Арадай Хуралай сеесинүүд болон хороонуудай суглаануудта нютагай засагай байгууламжын һунгамалнууд эдэбхитэйгээр хабаададаг гэжэ тэмдэглэхэ байнаб. 2017 оной туршада Арадай Хуралай бүхы хороонууд болон фракцинууд нютагай засагай байгууламжануудта 50-һаа дээшэ ажалай нүүдэл зүблөөнүүдые үнгэргэһэн байна», - гэжэ Владимир Павлов хөөрэбэ.
Ажаһуугшадай хандалгануудта түрүүлэн анхарна
Үнгэрһэн жэлэй туршада һунгамалнууд эдэбхитэйгээр ажаһуугшадтай уулзажа, хэһэн ажал тухайгаа тоосожо, аймагуудта үнгэргэгдэһэн суглаан, хуралдаануудта эдэбхитэйгээр хабаадаа. Ажаһуугшадһаа 500-һаа дээшэ хандалганууд ороһон байна, тэрэ тоодо 30-аад хандалганууд интернет холбоогоор ороо. Тиихэдэ ажаһуугшадтай уулзалгада онсо анхарал хандуулагдаа. Буряад Уласай Арадай Хуралай хороонуудта хубиин асуудалаар 300-һаа дээшэ ажаһуугшадые хүлеэн абаһан байна. Арадай Хуралай хүтэлбэрилэгшэд 52 хүнүүдээр хубиин асуудалаар уулзаа.
«Үмхирһэн, тэндэ ажаһуухада аюултай гэжэ тоологдоһон гэрнүүдһээ зөөхэ, гэр байратай болохо асуудалнуудаар эгээл олон хандалганууд ороһон байна. Номуудые хэблэхэ талаар, ажаһуугшадта ниигэмэй туһаламжа болон мүнгэнэй талаар туһа хүргэхэ асуудалаар хандалганууд олоор ородог», - гэжэ Арадай Хуралай вице-спикер Владимир Павлов хэлэбэ.
Зүблэлэй тогтоолнууд дүүрэн бэелүүлэгдээгүй
2017 ондо Арадай Хуралай Зүблэлэй арбан суглаанууд үнгэргэгдөө, тэрэнэй үедэ 37 асуудалаар һунгамалнууд зүбшэһэн байна. Тэдэнэй ехэнхи хубинь засаг зургаанай гүйсэдхэхы хороонууд хэр зэргэ хуулинуудые бэелүүлнэб гэһэн асуудалда зорюулагдаһан байгаа. Буряад Уласай Засагай газарта, нютагай өөһэдын хүтэлбэринүүдтэ болон Тоололгын танхимда оруулһан 57 зууршалалгануудай, 11-ниинь бэелүүүлэгдээгүй гэжэ тэмдэглэхэ хэрэгтэй. Шалтагааниинь гэхэдэ, мүнгэнэй дутагдал.
«Бэелүүлэгдээгүй зууршалгануудай заримыень байгша ондо дүүргэхэ гэжэ шиидхэһэн байна. Тэдэниие дүүргэхэ тула мүнгэн дуталдана гэжэ ойлгохоор. Жэлэй түрүүшын гурбан һарада тусхай хороонууд болон яамануудта энээндэ анхаралаа хандуулжа, суг хамта ажал ябуулыт гэжэ гуйха байнаб», - гэжэ Буряад Уласай Арадай Хуралай түрүүлэгшэ Цырен-Даша Доржиев хэлэбэ.
Үнгэрһэн жэлэй дүнгүүдые согсолжо, түсэблэгдэһэн хэмжээ ябуулганууд бэелүүлэгдээ гэжэ Буряад Уласай Арадай Хуралай Зүблэлэй гэшүүд тэмдэглэбэ. Үшөө тиихэдэ Буряад Уласай ниигэмэй-эдэй засагай хүгжэлтэдэ аша үрэтэй шухала, түсэблэгдөөгүй хэмжээ ябуулгануудшье эмхидхэгдэһэн байна.
Буряад Уласай Арадай Хуралай мэдээсэлэй албанһаа гэрэл зураг абтаба
