806
Буряад Уласай Толгойлогшо Алексей Цыденов Москва хотодо Ородой Холбоото Уласта Япон бүойин эрхэтэ элшэн сайд Тоехиса Кодзукитай уулзаба.
Уулзалгын үедэ Япон болон Буряад уласай хоорондо эдэй засагай һалбарида суг хамта ажал ябуулха, соёлой хэмжээ ябуулгануудые үнгэргэхэ тухай хэлсэбэ. Тиихэдэ Буряад Уласай минеральна-түүхэй эдэй комплексын, аяншалгын арга боломжонууд болон Улаан-Үдын авиационно заводой үйлэдбэрилдэг бүтээлнүүд тухай хөөрэһэн байна.
Буряад Уласай Толгойлогшо Алексей Цыденов Ородой Холбоото Уласта 2018 он Японой жэл, Японидо – Ородой Холбоото Уласай жэл гэжэ соносхогдонхой гэжэ тэмдэглэбэ. Тиимэһээ энэ жэл хоёр гүрэнүүдэй хоорондохи харилсаан саашадаа хүгжэжэ, улам бэхижүүлгэдэ нүлөөлхэ.
«Ород, Япон гүрэнүүдэй хоорондо харилсаа хүгжөөхэдэ можо нютагуудай хэмжээндэ хүгжөөхэ шухала. Япон болон Буряад Уласай хоорондо аяншалга хүгжөөхэ, улам дэлгэрүүлхэ талаар, мүнгэ һомололгын талаар ажал ябуулха, олзын хэрэг эрхилэгшэдэй дунда харилсаа байгуулха арга боломжонууд маанадта бии», - гэжэ Алексей Цыденов хэлэбэ.
Япон болон Буряад уласай хоорондо аяншалга, байгаали хамгаалга, мүнгэ һомололгын һалбаринуудта аша үрэтэйгөөр ажал ябуулха тухай уулзалгада хэлсэһэн байна. Ородой Холбоото Уласта Япониин бүрин эрхэтэ элшэн сайд Тоехиса Кодзуки Буряад Уласай Толгойлогшотой, уулзажа танилсаһандаа баяраа мэдүүлбэ.
Ород болон Япон гүрэнүүдэй хоорондо харилсаан хүгжэжэ, дэлхэйн зэндэмэни болохо Байгал далай һахигша Буряад тухай Япондо һурталшалха талаар ажал ябуулха тухай элшэн сайд хэлэбэ. Тоехиса Кодзукиин хэлэһээр, Буряад Улас тухай Япондо һонирхожо, олзын хэрэг эрхилэгшэд албан хэрэгэй харилсаа үргэдхэхэ.
Буряад Улас Япон гүрэн хоёрой хоорондо соёлой харилсаа хүгжөөлгэдэ Буряадай оперо болон баледэй театрай уран һайханай хүтэлбэрилэгшэ Морихиро Ивата болон тэрэнэй соёлой жаса горитой хубитаяа оруулһан байна гэжэ уулзалгада тэмдэглэбэ.
Ородой Холбоото Уласта Япониин бүрин эрхэтэ түлөөлгын газарта хуби ниилүүлһэн «Улаан-Үдын завод» бүлгэмэй хүтэлбэрилхы захирал Леонид Белых, хуби ниилүүлһэн хаамал «Байкальская лесная компания» бүлгэмэй захирал Евгений Пруидзе, уласхоорондын ИФК «Метрополь» департаментын хүтэлбэрилэгшэ Олег Великоредчанин, «Ая-Ганга» эмхиин хүтэлбэрилэгшэ Руфина Уюина, Япон гүрэндэ можо нютагуудай хүгжэлтын жасын түлөөлэгшэ Наталья Санжиева, Буряад Уласай хүгжэлтын жасын зүбшэлэгшэ Булат Дашиев, Буряад Уласай үйлэдбэриин болон худалдаа наймаанай сайд Алексей Мишенин, байгаалиин нөөсэнүүдэй сайд Юрий Сафьянов болон аяншалгын сайд Мария Бадмацыренова гэгшэд Буряад улас түлөөлбэ.
Ородой Холбоото Уласта Япон гүрэнэй бүрин эрхэтэ түлөөлгын газарай сайдууд Хироси Тадзима, Токуро Хуруя, Ород гүрэндэ япон корпорацинуудай захиралнууд Минору Фурусава («Мицубиси корпорейшн»), Юкихико Окумура («Мицубиси Хэви Индастриз»), Тосиаки Маруока («Мицуи»), Тосиюки Цугэ («Хитачи Сейсакусе (Мануфакчуриз»), Дайсукэ Такахаси («Банк оф Токио-Мицубиси ЮФДжей (Евразия)»), Буряадай оперо болон баледэй уран һайханай хүтэлбэрилэгшэ Морихиро Ивата болон Япон гүрэнэй бусад түлөөлэгшэд уулзалгада хабаадаба.
Уулзалгын һүүлээр Ородой Холбоото Уласта Япон гүрэнэй бүрин эрхэтэ элшэн сайд Тоехиса Кодзукиие Буряад Улас ерэжэ, Ород гүрэндэ Япон гүрэнэй жэлдэ зорюулһан хэмжээ ябуулгада хабаадахыень Алексей Цыденов уриба.
Буряад Уласай Засагай газарай мэдээсэлэй албанһаа гэрэл зураг абтаба.
