934
Мүнөөдэр, январиин 29-дэ, Ородой Холбоото Уласай Федерациин Зүблэлдэ Буряад Уласай үдэрнүүд эхилбэ.
Мүнөөдэр Федерациин Зүблэлэй мүнгэн һангай хорооной үргэдхэгдэһэн суглаан үнгэргэгдэхэ. Энэ хэмжээ ябуулгада Буряад уласай Засагай газарай Түрүүлэгшын орлогшо Игорь Шутенков уласай бюджед тэнсүүрииень алдууллангүй, хангалгын асуудалаар элидхэл уншаха юм.
«Буряад Уласай ниигэмэй-эдэй засагай хүгжэлтэдэ гүрэнэй дэмжэлгэ» гэһэн Федерациин Зүблэлэй тогтоолой түсэлдэ дурадхалнуудые оруулжа, уласай эдэй засагай федеральна хэмжээндэ хүгжэхэ талаар нэмэлтэ арга боломжонууд олгогдохо.
Январиин 30-да Буряад Уласай Толгойлогшо Алексей Цыденов Федерациин Зүблэлэй федеративна байгуулалта, можо нютагуудай бодолго, нютагай өөһэдын хүтэлбэри болон Хойто зүгэй хэрэгүүдэй хорооной түрүүлэгшэ Олег Мельниченкотэй уулзаха юм. Удаань уласай хүтэлбэрилэгшэ Буряад Уласай нигэмэй-эдэй засагай хүгжэлтын шухала асуудалнуудаар үргэдхэгдэһэн суглаанда хабаадаха. Ородой Холбоото Уласай бусад можо нютагуудтай хамта Буряад Улас тусхай зиндаатай болонхой. Тэрэнэй ёһоор, Буряад Улас болон бусад можо нютагуудта түрүүлэн гүрэнэй программанууд байгуулагданхай. Тэдэнэй тоодо, туршалгыншье.Байгаалай хизаарта бэелүүлэгдэхэ түсэл болон хэмжээ ябуулгануудые шэлэн абалга, тэдэниие яажа хаража үзэхэб гэһэн асуудалаар манай уласай оруулһан дурадхалнуудаар суглаанда хэлсэхэ.
Энэл үдэр Алексей Цыденов Федерациин Зүблэлэй эдэй засагай бодолгын хорооной түрүүлэгшэ Дмитрий Мезенцевтэй уулзаха. Удаань энэ хорооной суглаанда «Буряад Уласай хангалгын байгууламжын хүгжэлтын зарим тэды асуудалнууд тухай» гэһэн элидхэл уншаха юм. Элидхэлэй гол асуудалнуудые нэрлэбэл, иимэ: ТЭЦ-2 барилга, авиа ниидэлгэ хүгжөөхэ, «Улаан-Үдэ – Турунтаево – Хурамхаан – Новый Уоян» гэһэн харгын барилга үргэлжэлүүлхэ, Улаан-Үдэдэ гурбадаха хүүргэ бариха.
Тиихэдэ Федерациин Зүблэлэй баталан хамгаалгын хорооной суглаанда Буряад Уласай Засагай газарай Түрүүлэгшын хангалгын байгууламжа хүгжөөхэ талаар орлогшо Евгений Луковников хабаадажа, Ород, Монгол гүрэнүүдэй хилэ гараха Буряадтахи пунктын асуудалнуудаар хэлсэхэ гэжэ түсэблэгдэнхэй. «Монды», «Айнек-Гол» гэһэн хоёр зуруудтай машинаар хилэ гараха пунктнууд болон түмэр замай «Наушки» станцида һэльбэн шэнэдхэлгын ажал ябуулха тухай хэлсэгдэхэ юм.
Январиин 30-да Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжапов Федерациин Зүблэлэй эрдэм, болбосорол болон соёлой хорооной суглаанда хабаадаха. Буряад Уласай соёлой һалбариин болон соёлой һалбарида уласхоорондын хэмжээндэ ажал суг ябуулха арга боломжонууд тухай тэрэ хөөрэхэ. Тиихэдэ соёлой һалбариин байшануудые һэльбэн шэнэлхэ, бариха асуудалнуудаар зүбшэн хэлсэхэ юм. Тэдэнэй тоодо, Буряад Уласай Үндэһэтэнэй номой санда болон Буряадай хатарай колледждо залгалаа байшан бариха, һэльбэн шэнэдхэхэ асуудалнууд түсэблэгдэнхэй. Буряад Уласта болбосоролой хангалгын байгууламжа мүнөө үеын эрилтэнүүдтэ тааруулан шэнэдхэхэ тухай Вячеслав Цыбикжапов элидхэхэ юм.
Буряад Уласай Засагай газарай Түрүүлэгшын эдэй засагай хүгжэлтын талаар орлогшо Игорь Зураев Федерациин Зүблэлэй аграрна-эдеэ хоолой бодолгын болон байгаали ашаглалгын хорооной түрүүлэгшэ Михаил Щетининтэй уулзаха. Удаань«Байгалай хизаарта байгаали хамгаалгын болон ажахы эрхилэлгэ хуули эрхын талаһаа гуримшуулан нарижуулха тухай» гээһн элидхэл уншаха.
Январиин 31-дэ Алексей Цыденов Федерациин Зүблэлэй түрүүлэгшэ Валентина Матвиенко гэгшэтэй уулзаха түсэбтэй. Энэ уулзалгада Буряад Уласай Арадай Хуралай түрүүлэгшэ Цырен-Даша Доржиев, Федерациин Зүблэлэй гэшүүд болон Буряад Уласай Засагай газарай түлөөлэгшэд хабаадаха юм.
Федерациин Зүблэлдэ Буряад Уласай үдэрнүүд гэһэн хэмжээ ябуулгада дашарамдуулан, уласай ниигэмэй-эдэй засагай хүгжэлтэдэ зорюулһан үзэсхэлэн дэлгэгдэхэ юм. «Час субъекта» гэһэн хэмжээ ябуулгада Буряад Уласай Толгойлогшо Алексей Цыденов аяншалга хүгжөөлгын, ой үйлэдбэриин, ашагта малтамалнуудые олзоборилхо, машинануудые бариха асуудалнуудаар элидхэхэ.
Тиихэдэ февралиин 1-дэ Москва хотын метрополитенэй «Воробьевы горы» станцида Буряадай уран гартанай бүтээлнүүдэй үзэсхэлэн дэлгэгдэхэ юм.
