968
Федерациин Зүблэлдэ Буряад Уласай үдэрнүүдтэ Арадай Хуралай хороонуудай түрүүлэгшэнэр болон сүлөөтэ тушаалтай һунгамалнууд хабаадаһан байна.
Ородой Холбоото Уласай парламентын хороонуудай суглаанда Буряад Уласай Арадай Хуралай Бюджедэй, налогуудай болон сан жасын талаар хорооной сүлөөтэ тушаалтай һунгамалнууд хабаадалсаа. Тэдэнэй тоодо, Виталий Лыгденов гэжэ Буряад Уласай Арадай Хуралай хэблэлэй албанда мэдээсэнэ.
«Энэ хэмжээ ябуулгада хабаадаха болоходоо, түрүүшээр һэжэглэнгеэр хандаабди: олон зон, ехэ гаргаша. Тиигээд гурбан үдэрэй туршада дээдын засаг зургаанда ажаллаһанай удаа манай хандаса хубилаа», - гэжэ Виталий Лыгденов хэлэбэ. Тэрэнэй хэлэһээр, нэн түрүүн энэ хадаа Федерациин Зүблэлэй хороонуудай суглаануудта Буряад Уласта удха шанартай асуудалнуудтай хабаатай.
«Буряад Уласай түлөөлэгшэдэй табиһан асуудалнууд олоной һонирхол татаһан байна. Бюджедэй хорооной суглаанда Буряад Уласта ниигэмэй уялгануудаар бюджедэй гаргаша 90 хубиһаа дээшэ болодог гэһэн мэдээсэл гайхуулаа. Бэшэ можо нютагуудта энэ тоо 60-70 хубиһаа дээшэ болодоггүй. «Буряад Уласай хүгжэлтэдэ ямар мүнгэн үлэдэг?» - гэжэ маанадһаа суг хүдэлдэг нүхэд асууһан байна. Тогтоолой түсэлдэ хуулиин талаар манай оруулһан дурадхалнуудые Валентина Матвиенко ехэ анхараа. Энэ хэмжээ ябуулгын үедэ эмхидхэгдэһэн үзэсхэлэн Федерациин Зүблэлэй түрүүлэгшэдэ һайхашаагдаа. Манай уласта удха шанаратй үдэрнүүд үнгэргэгдэбэ. Федерациин Зүблэлдэ ябуулһан ажал һайн ашаг үрэтэй байха гэжэ һананаб», - гэжэ Виталий Лыгденов тобшолбо.
Буряад Уласай Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшэЦыденжап Батуев Федерациин Зүблэлдэ Буряад Уласай үдэрнүүдһээ юу хүлеэһэн тухайгаа һанамжаараа хубаалдаба.
«Иимэ хэмжээ ябуулга 2009 ондо үнгэрһэн байна. Тиимэһээ мүнөө үнгэргэгдэһэн Федерациин Зүблэлдэ Буряад Уласай үдэрнүүд һайн эмхидхэлтэй үнгэрөө гэжэ хэлэхэ байнаб. Намда юун һайхашаагдааб гэхэдэ, тусхай һалбаринуудаар хороонуудай суглаанууд эмхидхэгдээ. Эндэ Буряад Уласай Арадай Хуралай һунгамалнууд болон тусхай һалбариин яамануудай түлөөлэгшэд хабаадалсаа. Буряад Уласта шиидхэхэ асуудалнууд тухай федеральна талмайда хэлэхэ арга боломжо дүүрэн хэрэглээбди. Эдэ асуудалнууд, Буряад Уласта онсо өөрэшье һаа, бэшэ можо нютагуудтахи асуудалнуудтай адлишуу. Тиихэдэ Эдэй засагай бодолгын хорооной суглаанда ТЭЦ-2, Новый Уоян хүрэтэр харгын барилга дүүргэхэ, Үдэ гол дээгүүр гурбадахи хүүргэ бариха тухай асуудалнуудаар хэлсэгдэһэн байна. . Ниигэмэй бодолгын талаар хороон болон Соёлой, болбосоролой болон эрдэм ухаанай хороонуудай суглаанда гурбан ээлжээндэ һурадаг уласай һургуулинууд тухай зүбшэбэ. Федерациин Зүблэлэй хэмжэндэ Поселье һууринай һургуули тухай хэлсэгдэхэдэнь, Ивалга аймагһаа дэбжүүлэгдэһэн намда ехэ һайшаагдаа. Мүнөө ехэ ажал ябуулагдажа байна. Тиимэһээ үнгэргэгдэһэн хэмжээ ябуулгын дүнгүүд Федерациин Зүблэлдэ шиидхэгдэхын тула, Буряадай хоёр сенаторнууд ехэ оролдолго гаргаха болоно».
Федерациин Зүблэлэй архивһаа гэрэл зураг абтаба.
