951
Буряадай Арадай Хуралай ээлжээтэ бэшэ сессиин үедэ шэнэ һургуулинуудые барилгада нүлөөлхэ тон шухала шиидхэбэринүүд абтаа.
Бүхы Ород гүрэн соо оройдоол хоёр можо нютагта үхибүүд гурбадахи халаанда эрдэм ном шудалжа зобоно гээшэ. Тэдэнэй тоодо Буряад Уласай оролсоһониинь голхормоор. Энэ шухала асуудалые шиидхэхын тула гүрэнэй бюджедһээ дабхар мүнгэн һомологдохонь. Тэрээндэ хүртэхын тула Буряадай һунгамалнуудта 2018 , 2019 ба 2020 онуудай түсэбтэ хугасаагай уласай бюджедтэ хубилалтануудые оруулха хэрэгтэй байгаа.
Сесси дары түргөөр зарлагдабашье, һунгамалнууд олоор сугларжа, энэ байдалда өөрын хандаса харуулба. Тэдэ нэгэ дуугаар хубилалтануудые оруулаа. Тиигэжэ һургуулинуудые бариха хэрэгтэ 2019 ондо Буряадта 315,9 сая түхэриг, 2020 ондо 243,5 сая түхэриг дамжуулагдаха юм.
Буряад Уласай болбосоролой болон эрдэм ухаанай сайд Баир Жалсановай хэлэһээр, нэн түрүүн табан һургуули баригдаха, үшөө гурбан һургуули заһабарилагдаха болоно.
Мүнөө үедэ уласай бюджедэй мүнгөөр Ивалга аймагай Гүрэльбэ һууринда 450 һууритай һургуули баригдажа эхилбэ. Үшөө тиихэдэ байгша ондо Тарбагатай аймагай Доодо Саянта һууринда болон Улаан-Үдэ хотын 112 хороололдо 450 һууритай һургуулинууд шэнээр бодхоогдожо эхилхээр хараалагдана. 2019 ондо Ивалга аймагай Поселье һууринда баһа 450 һууритай һургуули баригдахаар түсэблэгдэнхэй.
Улаан-Үдэ хотын һургуулинуудта гурбадахи халаанда үзэлгые усадхахын тула зарим һуралсалай гуламтануудта залгалаа бариха ажал ябуулагдаха байна. Тиигэжэ 33 дугаар гимнази болон 25 дугаар һургуулида 210- 250 һууритай залгалаа байранууд баригдаха.
Ород гүрэнэй бюджедэй мүнгэн зөөриин ашаар гурбан һургуули һэльбэн шэнэлэгдэхэ юм. Кабанскын аймагай Клюевкэ, Сэлэнгэ аймагай Новоселенгинск болон Хурамхаан һууринуудта хуушарһан һуралсалай гуламтанууд заһабарилгада орохо.
Баир Жалсановай хэлэһээр, бүхы һурагшадые багтааха гэбэл болон үхибүүдээ нэгэ халаанда үзүүлхэ гээ һаа, уластамнай 46 һургуули хэрэгтэй болоно. “Байтараа эдэ бэрхэшээлнүүд заал һаа шиидхэгдэхэ бэзэ”, - гэжэ сайд найдан хэлэнэ.
Борис БАЛДАНОВ
