869
Буряад Уласта ашагта малтамалнуудай уурхайнуудые “Новотранс” бүлгэм элдүүрилжэ эхилхэ түсэбтэй. Тиимэһээ тэрэ уурхайнуудта хүрэхэ түмэр харгы бариха шухала. Энэ хэрэгтэ компани мүнгэ һомолхо болоно гэжэ Буряад Уласай Толгойлогшо Алексей Цыденов “Интерфакс” агентствэдэ хэлэбэ.
“Бидэ “Новотранс” компанида ашагта малтамалнуудай уурхайнуудай тобьёг дурадханхайбди. Тэдэнэр уурхайнуудые сэгнэнэ, үзэнэ. Ашагта малтамануудай уурхайнууд улас дотор олон, тэдэндэ хүрэхэ түмэр харгы үгы. Тиимэһээ барилга хэгдэхэ болоно. Гансал хэр холо хүрэтэр харгы баригдахаб гэжэ асуудал гарана”, - гэжэ Алексей Цыденов үнгэрһэн гарагай табанда хэлэһэн байна. “Ашагта малтамалнуудай уурхайнууд нөөсэнүүдэй, бүридэлэй талаар илгаатай. Тиимэһээ хангалгын байгууламжын эрилтэнүүд баһал ондо ондоо. Энээнһээ уламжалан тус бүлгэм эдэй засагай һалбариин талаһаа байдал сэгнэнэ”, - гэжэ уласай хүтэлбэрилэгшэ нэмэжэ хэлэбэ.
“Хэн түмэр харгы барихаб гэжэ түсэлэй эдэй засагһаа дулдыдаха. Нэгэн гээ һаа энэ түсэлдэ мүнгэ зөөри оруулагшад, үгы гэбэл можо нютаг. Энэ асуудал шэрэхэ ашаанай хэмжээнһээ дулдыдаха. Тиихэдэ “Ородой Холбоото Уласай түмэр харгы” мүнгэ һомололгодо хабаадажа болохо. Эдэ бүхы асуудалнуудай аша үрэ тоологдоно. “Новотранс” бүлгэм түмэр харгы барилгада мүнгэ һомолхо зэргэтэй”, - гэжэ Буряад Уласай Толгойлогшо хэлэбэ.
“Буряад Уласта шулуун нүүрһэнэй болон түмэр рудагай уурхайнуудые ашаглаха компани уласта байгуулха гэжэ “Новотранс” бүлгэмэй захирал Костантин Гончаровай хэлэһэн тухай байгша оной февралиин тэн багта Буряад Уласай Засагай газарай хэблэлэй албан мэдээсэһэн байна. Тиихэдэ Константин Гончаров “Интерфакс” агентствэдэ Буряад Уласта компнаи байгуулха тухай түсэбүүдээ баталаа. Тиихэдэ хаана, ямар ажал хэгдэхэб, хэды шэнээ мүнгэ һомолхо тухайгаа тодорхойлоогүй. “Ямар ажал хэгдэхэб гэжэ ерээдүйдэ 10-20 жэлдэ ашагта малтамалнуудай эрилтэ асуулта ба дурадхал хаража үзэнэбди”, - гэжэ Константин Гончаров хэлэбэ.
Буряад Улас болон “Новотранс” бүлгэм суг ажалаа ябуулха тухай хэлсээ баталһһан байна. “Новотранс” бүлгэмые уласай татабариин гурим болон мүнгэ зөөри оруулалгын арга боломжо һонирхуулаа гэжэ Буряад Уласай Засагай газарай хэблэлэй албан мэдээсээ. Буряад Уласай Толгойлогшын хэлэһээр, энээнһээ урид “Новотранс” бүлгэм шулуун нүүрһэ олзоборилхо талаар олзын хэрэг эрхилһэн байха юм.
“Новотранс” бүлгэм хадаа Ородой Холбоото Уласай түмэр харгын операторнуудай нэгэн болоно. Тэдэнэй паркда 28 мянганһаа дээшэ ашаа шэрэхэ хушалтагүй вагонууд бии. Энэ бүлгэм Москва, Кемерово, Эрхүү можонуудта болон Алтайн хизаарта өөһэдын заһабарилгын 4 үйлэдбэритэйюм.
