663
Буряад Уласай Толгойлогшо Алексей Цыденов хойто аймагуудаар албанай хэрэгүүдээр ябаһанай удаа Северобайкальск хото болон Хойто-Байгалай аймаг нэгэдүүлхэ түсэб үгы, “Северобайкальск” һомоной засаг дарга тушаалһаа бууха шиидхэбэри ганса бэшэ гэжэ сурбалжалагшадтай уулзаха үедөө уласай хүтэлбэрилэгшэ хэлэбэ.
- Хойто аймагуудаар ябаһанай удаа Северобайкальскын засаг дарга тушаалаа сүлөөлхэ шиидхэбэри абтаба. Һунгалта үнгэрһэнэй һүүлээр шиидхэбэри абабал, тааруу бэшэ байгаа, - гэжэ уласай хүтэлбэрилэгшэ тэмдэглэбэ.
Алексей Цыденовэй хэлэһээр, иимэ уулзалганууд ганса Северобайкальскын засаг даргатай үнгэргэгдөө бэшэ.
- Ганса Константин Горюновтай бэшэ, харин хэдэн хүнүүдээр уулзаһан байнаб. Энээн тухай гараһан долоон хоногто мэдээжэ болохо, - гэжэ Алексей Цыденов хэлэбэ.
Северобайкальск хото болон Хойто-Байгалай аймаг нэгэдүүлхэ түсэб үгы гэжэ уласай хүтэлбэрилэгшэ тэмдэглэбэ.
- Нэгэдүүлхэ түсэб үгы, түрүүн ажаһуугшадһаа һураха хэрэгтэй, - гэжэ уласай хүтэлбэрилэгшэ хэлэбэ.
Мартын 2-то Буряад Уласай Толгойлогшо Алексей Цыденов болон “Северобайкальск хото” гэһэн нютагай засагай байгууламжын дарга Константин Горюнов хоёр уулзаһан байна. Удаань Константин Горюнов өөрын дураар тушаалһаа бууха тухай мэдүүлгэ бэшээ. Тус мэдүүлгэ Северобайкальск хотын һунгамалнуудай зүблэлдэ дамжуулагданхай.
«Үнгэрһэн, байгша жэлнүүдтэ хойто аймагуудаар ябажа, гаргаһан дүнгүүдээр Северобайкальск хотын хүтэлбэрилэгшэтэй уулзаһан байнабди. Тиихэдэ олон асуудалнууд гараһан байна, тэрэ тоодо олзо тухай мэдүүлгэ, хүндөөр үргэжэ байһан дулаа үгэлгын хаһа, хүйтэн гэр байранууд болон бусад. Зарим асуудалнууд хэдэн жэлэй туршада шиидхэгдээгүй, тиимэһээ гэмнэхэ буруу. Тиигэбэшье зарим тэды асуудалнуудаар хүтэлбэрилэгшэ түргэн дары шиидхэбэринүүдые абаха аргатай байгаа», - гэжэ Алексей Цыденов хэлэбэ.
Северобайкальск хотын засаг даргын уялга дүүргэгшэ һаяын үдэрнүүдтэ томилогдохо. Северобайкальск хотын засаг даргын һунгалта байгша оной сентябрь һарада үнгэргэгдэхэ юм.
