729
Буряад Уласай Толгойлогшо Алексей Цыденов мүнөөдэр үглөөнэй 9 сагта Улаан-Үдэ хотын Дээдэ Онгостойдо оршодог «Родник» гэһэн элүүржүүлгын-болбосоролой түбтэ 723 дугаар һунгуулиин газарта дуугаа үгэбэ.
«Мүнөөдэр, хүндэтэ нютагаархид, һунгалта ерэжэ хабаадахыетнай уряалнаб. Түрэл нютагаа үргэхэ, өөдынгөө, үри хүүгэдэйнгээ ажана тэнюун байдалай түлөө дуугаа үгэхыетнай уринаб. Ородой Холбоото Уласай, мүн тиихэдэ Буряад Уласай хуби заяан һунгалтаһаа дулдыдана», - гэжэ Алексей Цыденов Буряадай ажаһуугшадта хандаба.
Буряадай хүтэлбэрилэгшэ ажаһуугшад эдэбхитэйгээр һунгаха гэжэ бата найдалтай.
Һунгуулиин газарта Алексей Цыденов 2018 оной футболоор дэлхэйн чемпионадта болельщигэй үнэмшэлгэ абаһан байна. Волонтёрой хэлэһээр, 723 дугаар һунгуулиин газарта үшөө 46 хүндэ иимэ үнэмшэлгэ барюулагдаха. Буряадай дэбисхэртэ 11 мянганһаа дээшэ хүн иимэ үнэмшэлгэнүүдтэй болохо, тэдэнэр дэлхэйн чемпионадай сэхэ дамжуулгануудые Түбэй стадиондо түлбэригүйгөөр хараха аргатай юм.
Мүн тиихэдэ «Болбосон түхэлтэй хотын оршон» гэһэн түсэлөөр уласай хүтэлбэрилэгшэ Үдэ, Сэлэнгэ голой эрьеын эрхим дизайн-түсэлэй, болбосон түхэлтэй болгогдохо олониитын газарай түлөө һунгаһан байна.
Болбосон түхэлтэй болгогдохо газарнуудай һунгалта 94 газарта эмхидхэгдэхэ юм. Эдэ газарнууд һунгуулиин газарнуудтай нэгэ байшанда гү, али зэргэлээд байшануудта оршоно. Алексей Цыденовэй тэмдэглэһээр, ажаһуугшад Үдэ, Сэлэнгэ голнуудай эрье ямар түхэлтэй болохоб гэжэ шэлэхэ юм.
- Байгша ондо энэ түсэлөөр хэб жэшээ хэгдэжэ эхилхэ, удаань тэрэнэй сэнһээ дулдыдажа, бэелүүлэгдэхэ болзор элирүүлэгдэхэ. Ажаһуугшадай шиидхэбэреэр ажал хэгдэхэ. Тиимэһээ ажаһуугшадта һайхашаагдаагүй һаань, ондоо хүнүүдые бэшэ, харин гансал өөрыгөө зэмэлхэһээ бэшэ юумэн байхагүй, - гэжэ Алексей Цыденов хэлэбэ.
Үдэ, Сэлэнгэ голнуудай эрье болбосон түхэлтэй болгохо талаар эрхим дизайн-түсэлэй мүрысөөн байгша оной январиин 15-да уласай хүтэлбэрилэгшын үүсхэлээр эхилһэн юм гэжэ һануулнабди. Мэргэжэлтэ шүүбэришэдэй комиссида 25 мэдүүлгэ ороһон байха юм. Түгэсхэлэй шатада гурбан ажалнууд оробо. «Реки объединяют историю и культуру» (код УУ 318) гэһэн дизайн-түсэлөөр, эрьедэ «Байкал» гэһэн олон үйлэшэлгын түб, гэрлэлгын ордон, Даша Намдаковай хүшөө табигдаха юм.
«Красные ворота к морю» (код БП 942) гэһэн түсэл тамирай болон байгаали хамгаалгын шэглэлтэй юм. Түсэл зохёогшод Байгалай хизаарта оршодог байгаалиин эд хэрэглэхэ зорилго табиһан байна. Тиихэдэ вай-фай, харалгын талмайнууд байха. Үбэлэй сагта эндэ санаар ябаха, һолжорхо арга, зундаа велохаргынууд хараалагданхай.
Гурбадахи «Берега жизни» (код АС 878) гэһэн түсэлөөр гэр бүлөөрөө эдэбхитэй амарха зорилготой. Гэрэл зураг буулгаха газарнууд, тренажёр, йога, хатараар бэеэ һорихо арга болон бусад түсэблэгдэнхэй.
Һунгалтын дүнгүүдээр, эрьеын эрхим түсэл элирүүлэгдэжэ, илагшадта 1 сая түхэригэй шан барюулагдаха. Хоёрдохи һуурида – 300 000, гурбадахи һуурида 100 мянган түхэригэй шан апрелиин 5-да барюулагдаха. Удаань түсэлэй хэб жэшээ хэгдэжэ, барилыг-хабсаралгын ажалнуудай сэн тоологдохо.
Тиихэдэ уласай хүтэлбэрилэгшэ мүнөөдэр «Болбосон түхэлтэй хотын оршон» түсэлөөр дуугаа үгэбэ.
- Бүхы ажал нэгэ доро хэхэ аргагүй байһамнай харамтай, мүнөөдэр түрүүлэн хэгдэхэ ажалай түлөө дуугаа үгэнэбди. Хотомнай сэбэр, һайхан, зохид байхын тула дуугаа үгэбэб, - гэжэ Алексей Цыденов хэлэбэ.
Буряад уласай аймагуудай Хяагта, Гусиноозёрск, Северобайкальск, Закаменск, Бабушкин хотонууд, Турунтаево, Кабанск, Выдрино, Селенгинск, Онохой, Каменск, Сагаан-Нуур, Загарай һууринууд «Болбосон түхэлтэй хотын оршон» гэһэн түсэлнүүдтэ хабаадана.
Буряад Уласай Засагай газарай хэблэлэй албанай гэрэл зураг
