571
Буряад Уласай Арадай Хуралай түрүүлэгшэ Цырен-Даша Доржиев түрүүшүүлэй тоодо һунгуулиин газар ерэжэ, Ородой Холбоото Уласай Юрэнхылэгшын һунгалтада дуугаа үгэбэ.
Цырен-Даша Доржиев һунгуулиин комисиин гэшүүдһээ хуули эбдэхэ ушар дайралдана гү гэжэ һонирхожо, ажаһуугшадтай хөөрэлдэһэн байна. Арадай Хуралай түрүүлэгшэ дуугаа үгэжэ, болбосон түхэлтэй газарнуудые шэлэхэ, Үдэ, Сэлэнгэ голнуудай эрьеын эрхим дизайн-түсэлэй түлөө ажаһуугшадын һунгахыень уряалба.
- Гүрэн түрынгөө Юрэнхылэгшые мүнөөдэр һунганабди. Тиимэһээ хэнэй түлөө дуугаа үгэхэһөөмнай Ород гүрэнэй, тэрэ тоодо Буряад Уласай, хүгжэлтэ дулдыдаха. Мүнөөдэр Ородой Холбоото Улас дотор ёһотойл һайндэр, - Цырен-Даша Доржиев хэлэбэ.
Арадай Хуралай түрүүлэгшэ түрэлхидтэеэ хамта һунгалтада ерэдэгээ һанан, мүнөө өөрөө гэр бүлөөрөө һунгалтада хабаадаба.
- Бага балшар наһанһаа түрэлхидэйнгээ һунгалтада ошодогые һанадагби. Ёһотойл һайндэр бологшо һэн. Мүнөшье гэр бүлөөрөө һунгалтада хабаадажа дуугаа үгэбэбди. Ажабайдал һайжаруулха хүтэлбэрилэгшые һунгаха аргатай байнабди. Үхибүүд, аша зээнэртээ танай дуунһаа олон юумэн дулдыдаха гэжэ хэлэжэ байдагби. Залуушуул эдэбхитэйгээр һунгалтада хабаадажа, ажаһуугшад олоороо һунгалтада ерэхэ гэжэ найданаб, - Цырен-Даша Доржиев тэмдэглэбэ.
Ородой Холбоото Уласай Юрэнхылэгшын түлөө дуугаа үгэһэнэй удаа, Арадай Хуралай түрүүлэгшэ «Болбосон түхэлтэй хотын оршон» түсэлөөр олониитын газаарай түлөө һунгаба.
- Буряадай ниислэл хото жэлһээ жэлдэ гоё болохо гэжэ найдана. Үдэ, Сэлэнгэ голой эрьеын хоёр дизайн-түсэлэй түлөө, тиихэдэ ЛВРЗ-эйн сэсэрлигэй түлөө дуугаа үгэбэб. Би өөрөө Железнодорожно хороодо ажаһуудагби, тиимэһээ манай аймаг сэбэр, болбосон түхэлтэй болгохын түлөө ажал хэхэ болонобди, - гэжэ Цырен-Даша Доржиев хэлэбэ.
Иван Подберёзкинай гэрэл зураг
