753
Буряад Уласай Толгойлогшо Алексей Цыденовэй гуйлтаар Ородой Холбоото Уласай Дотоодын хэрэгүүдэй яаман Түнхэн аймагта тохёолдоһон байдал хинахань. Үглөөдэр, апрелиин 19-дэ, уласай хүтэлбэрилэгшэ албанай хэрэгээр Түнхэн гаража, аймагай захиргаан, зүблэл болон ажаһуугшадтай уулзаха түсэбтэй. «Түнхэн аймагта тохёолдоһон эсэргүү байдал улам хүгжэжэ, тэрээндэ хабаадагшадай олошорһон ушарһаа шиидхэбэри абаха хэрэгтэй. Минии гуйлтаар Ородой Холбоото Уласай Дотоодын хэрэгүүдэй сайд Владимир Колокольцевтой уулзалга үнгэрһэн байна. Тэрэнэй дүнгүүдээр, улас дотор тохёолдоһон энэ байдал Ород гүрэнэй дотоодын хэрэгүүдэй яаман хиналта доро абаба. Мүнөө гол зорилго хадаа аймаг дотор ажаһуугшадай аюулгүй, ажана тэнюун байдал сахилга болоно. Засаг зургаанай түлөөлэгшэдэй хоорондохи эсэргүүсэлгэ хуулииин хэмжээндэ үнгэржэ, ажаһуугшад тэрээндэ хабаадаха ёһогүй», - гэжэ Алексей Цыденов интернет сүлжээндэ өөрынгөө хуудаһануудта бэшэһэн байна.
Уласай хүтэлбэрилэгшын тэмдэглэһээр, «эндэ тохёолдоһон байдал эршэдүүлһэн хүн бүхэндэ онсо анхарал хандуулагдаха».
Алексей Цыденовтэй хамта Түнхэн аймаг Буряадай прокурор Галина Ковалёва болон Ородой Холбоото Уласай Мүрдэлгын хорооной Буряадтахи таһагай хүтэлбэрилэгшэ Андрей Кондин албанай хэрэгээр ошохо. Аймагай түбтэ ажаһуугшадые тэдэ хүлеэн абаха юм.
Үглөөдэр Түнхэн аймагай Хэрэн һууринай Ленинэй гудамжаар оршодог прокуратурада 10 сагһаа 12 болотор Галина Ковалёва ажаһуугшадые хүлеэн абаха. Энэл сагта Хэрэн һууринай Базарная гудамжаар оршодог Түнхэнэй аймаг хоорондын мүрдэлгын таһагта Андрей Кондин ажаһуугшадтай уулзаха. Тиихэдэ засагай түлөөлэгшэдтэй уулзаха гэбэл, ажаһуугшад заабол уридшалан нэрээ бэшүүлхэ болоно.
Галина Ковалёватай уулзаха гэбэл, 8(301-47) 41-577 гэһэн утаһаар хонходожо, нэрээ бэшүүлжэ болоно. Буряадай Мүрдэлгын хорооной хүтэлбэрилэгшэтэй уулзаха, уулзалгын эмхидхэлэй болон тэрэнэй ябаса тухай тобшо мэдээ абаха гэбэл, ажалай сагта 8 (3012) 21-49-87 (Димова Елена Георгиевна) и 8 (30147) 42-0-89 (Гармажапов Эрдэм Баирович) гэһэн утаһануудаар хонходожо болоно.
Уулзалгада хабаадаха эрхэтэд паспорт гү, али эрхэтэниие гэршэлһэн бусад данса заабол абажа ерэхэ ёһотой.
