918
Буряад Уласай Толгойлогшо Түнхэн аймагай асуудалаар шиидхэбэри абаба
Түнхэн аймагай хүтэлбэрилэгшэ болон аймагай һунгамалнуудай зүблэл эсэргүүсэжэ, аймаг дотор зүрилдөөтэ байдал тохёолдоһон байна. Үнгэрһэн долоон хоногто уласай хүтэлбэрилэгшэ Түнхэн аймаг гаража, ажаһуугшадтай болон аймагай хүтэлбэрилэгшэ Иван Альхеев болон һунгамалнуудай зүблэлэй түрүүлэгшэ Аламжа Сыреновтэй уулзалгануудые үнгэргөө гэжэ һануулнабди. Мүнөөдэр, апрелиин 23-да, Түнхэн аймагай һунгамалнуудай зүблэлэй сессидэ зүблэлэй тараха тухай шиидхэбэри абтаа. Тиигэбэшье тэдэнэр байгша оной сентябриин 9 болотор уялгануудаа дүүргэхэ юм. Энэл үдэр аймагай һунгамалнуудай зүблэл шэнээр һунгагдаха. Түнхэнэй нютагай засагай байгууламжын хүтэлбэрилэгшэ мүнөөдэрһөө захиргаанай амаралтада гараба. Сентябриин 9-дэ ажаһуугшадай дунда асуулта үнгэргэгдэжэ, саашадаа Иван Альхеев аймаг хүтэлбэрилхэ гү гэжэ мэдээжэ болохо юм. Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжапов эзэлжэ байһан тушаалаа дүрбэн һарын туршада сүлөөлжэ, Түнхэн аймаг хүтэлбэрилхэ юм.
«Аймаг дотор ажаһуугшад хоёр тала барин хубааржа, зүрилдөөтэ байдал тохёолдоол байгаа. Үнгэржэ ерэхэдээ, ахалагша класуудай һурагшад баһал хубааржа эхилээ. Аймагай захиргаан болон һунгамалнуудай зүблэл хоорондо харилсанагүй, ажал ябуулагданагүй. Хэн нэгэниие зэмэлнэгүйб, байһан соонь хэлэнэб. Тиихэдэ аймагай һомонуудай захиргаантай ажал ябуулагданагүй. Иван Альхеевэй гү, али Аламжа Сыреновэй тала бариһан ажаһуугшадтай уулзажа, тэдэ энэ байдал ондоогоор харана гэжэ ойлгостой. Тэдэнэр саашанхи ажабайдалаа өөһэдөө шиидхэхэ аргатай. Тиимэһээ иимэ шиидхэбэри абтаа. Аймагай һунгамалнууд сентябрь һарада һунгалтада хабаадаха аргатай. Ажаһуугшад хэниие дэмжэнэб, тэрэл хүн үлэхэ», - гэжэ уласай хүтэлбэрилэгшэ хэлэбэ.
Алексей Цыденовэй хэлэһээр, Иван Альхеев саашадаа аймагай хүтэлбэрилэгшын тушаал эзэлхэ гү гэжэ ажаһуугшадһаа дулдыдаха.
«Ажаһуугшад Иван Альхеевэй ажал сэгнэхэ. Тэрэнэй ажал муугаар сэгнээ һаань, аймагай һунгамалнуудай шэнэ зүблэл тэрэниие буруушаажа, Иван Альхеев тушаалаа сүлөөлхэ юм. Тиихэдэ аймаг дотор һунгалта, тэрэнэй эмхидхэл Иван Альхеевэй хабаадалгүйгөөр эмхидхэгдэхэ юм. Аймагай хүтэлбэрилэгшэ тушаалаа сүлөөлхэ шиидхэбэри зүбшөөбэ. Тушаалаа сүлөөлхэгүйб гэжэ эсэргүүсэнгүй Иван Альхеев амаралтада гараба. Сентябриин 9-дэ Түнхэнэй 14 һомонуудай 12-то хүтэлбэрилэгшэ һунгагдаха. Тиихэдэ Арадай Хуралай, аймагай һунгамалнуудай зүблэл һунгагдаха», - гэжэ Алексей Цыденов тэмдэглэбэ.
Түнхэн аймагай хүтэлбэрилэгшын саг зуура уялга дүүргэгшын тушаалда Вячеслав Цыбикжаповай томилогдоһон тухай хэлэхэдээ, тэрэнэй хүтэлбэри доро Сэлэнгэ аймаг ажабайдалай олон һалбарида түрүүшүүлэй тоодо ябаа гэжэ уласай хүтэлбэрилэгшэ тайлбарилба.
«Тиигэбэшье аймаг доторой энэ байдал хараалан, тэрэнэй ажабайдал тухай мартаха хэрэггүй. Түнхэндэ үбэлжөөн хүндөөр үнгэрөө, энэ талаар ажал ябуулха шухала. Уласай хүдөөгэй зунай нааданууд Түнхэндэ үнгэргэдэхөө байна. Бүхы уласһаа хүнүүд ерэхэ, тиимэһээ бэлэдхэл ябуулха хэрэгтэй. Вячеслав Цыбикжапов энэ талаар ехэ дүй дүршэлтэй, эсэргүүсэһэн талануудтай нэгэндэшье хамжаагүй», - гэжэ Алексей Цыденов хэлэбэ.
Сентябриин 9-дэ Түнхэндэ һунгалта үнэн сэхээр үнгэрхын тула, бюллетень тоолохо тусхай оньһон хэрэглэгдэхэ юм.
Буряад Уласай Засагай газарай хэблэлэй албанай гэрэл зураг
