987
Мүнөөдэр, апрелиин 24-дэ, Буряад Уласай Арадай һунгамалнууд ээлжээтэ 29-дэхи сессидэ Буряадай Үндэһэн хуулиин Сүүд тарааха тухай хуули абаба. Энэ асуудалаар һунгамалнууд арсалдажа, Буряад Уласай Толгойлогшо ажаһуугшадай эрхэ хамгаалгада асуудалнууд гарахагүй гэжэ хэлэбэ.
Буряад Уласай Толгойлогшын болон Засагай газарай захиргаанай хүтэлбэрилэгшэ Баир Цыреновэй элидхэһэнэй ёһоор, зургаан жэлэй туршада Үндэһэн хуулиин сүүдтэ хандалганууд ороогүй. Тиихэдэ тэдэнэй хүдэлмэрилэгшэдтэ ажалай салингай жаса 10,8 сая түхэриг юм. Буряад Уласай Үндэһэн хуулиин сүүд тарааха гэһэн шиидхэбэри олониитын мүнөө үеын байдалай эрилтэ болоно гэжэ Баир Цыренов тэмдэглэбэ.
КПРФ намай түлөөлэгшэд энэ асуудал буруушааһан байна.
«Зургаан жэлэй туршада Үндэһэн хуулиин сүүдтэ хандалганууд ороогүйшье һаа, удаадахи жэлдэ энэ эмхи хэрэгтэй боложо магадгүй. Буряад Улас үндэһэтэ арадуудай улас, бидэ өөрын Үндэһэн хуулитайбди. Юундэ Үндэһэн хуулиин сүүд байха аргагүйб?» - гэжэ Фёдор Бураев хандаба.
Баир Цыреновтэй хамта элидхэгшэ Борис Ботоевой хэлэһээр, Буряад уласай Үндэһэн хуулиин сүүдтэ гаргашанууд, тэрэнэй ябуулһан ажалһаа ехэ. Тиихэдэ Ородой Холбоото Уласай Үндэһэн хуулиин сүүдэй үгы можо нютагуудта, ажаһуугшад Ородой Холбоото Уласай Үндэһэн хуулиин сүүдтэ хандаха аргатай юм.
Буряад Уласай Арадай Хуралай сессидэ энэ түлэб оруулһан уласай хүтэлбэрилэгшэ, ажаһуугшадай эрхэ хаһагдаһан байгаа һаа, энэ асуудал гарахагүй байгаа гжэ тэмдэглэбэ.
«Верховно сүүдтэ Үндэһэн хууляар асуудалнуудые шиидхэхээр гү? Шиидхэхээр. Сүүдэй үгышье һаа, эрхэ хамгаалха, эрхын талаһаа гуримшуулха хэрэгтэ асуудал гарахагүй», - гэжэ Алексей Цыденов тобшолбо.
Удаань энэ түлэбөөр һунгалта үнгэргэгдэжэ, 49 һунгамалнууд Үндэһэн хуулиин сүүд тарааха тухай дуугаа үгэбэ, долоон хүн буруушааһан байна. Тэрэнэй дүнгүүдээр, «Буряад Уласай үндэһэн хуулиин сүүд тарааха тухай» гэһэн Буряад Уласай хуули хоёр уншалгада абтаба.
Тиихэдэ уласай нормативна эрхын талаар үндэһэн хуулиин хиналта Ородой Холбоото Уласай Үндэһэн хуулида, федеральна хуулинуудта үндэһэлэн, Ородой Холбоото Уласай Үндэһэн хуулиин сүүдэй болон Буряад Уласай Верховно сүүдэй шиидхэбэреэр бэелүүлэгдэхэ юм.
Буряад Уласай 2013 оной ноябриин 14-дэ «Буряад Уласай хуули тогтоолгын зарим актнуудые хүсэеэ алдаһан тухай тооложо, тэрэнэй ажал тогтоохо тухай», 2014 оной декабриин 15-да «2015 он болон 2016-2017 түсэблэлгын жэлнүүдтэ уласай бюджет тухай» хуули абтажа, хуули тогтоолгын зарим актнуудые хүсэеэ алдаһан тухай тооложо, тэрэнэй ажал тогтоохо тухай» гэһэн хуулинуудаар Буряад Уласай Үндэһэн хуулиин сүүдэй ажаябуулга 2014 оной январиин 1-һээ тогтоогдоһон юм. Буряад уласай Үндэһэн хуулиин сүүд 2012 ондо тэрэнэй түрүүлэгшэ тушаалаа сүлөөлһэн ушарһаа боложо, эрхын талаар асуудалнуудые шиидхэнэгүй.
