882
Мүнөөдэр, апрелиин-24-дэ, Буряад Уласай Арадай Хуралай һунгамалнууд «Буряад Уласта эблэрүүлгын шүүгшэдэй болон сүүдэй участогуудай юрэнхы тоо» гэһэн хуулида хубилалтануудые оруулба. Тэрэнэй ёһоор, Ивалга аймагта сүүдэй үшөө нэгэ газар байгуулагдаха юм.
Федеральна хуулиин ёһоор, сүүдэй нэгэ участогта 15 мянганһаа 23 мянга хүрэтэр хүнүүд байха ёһотой. Буряад улас дотор сүүдэй 54 газарнууд байгуулагдажа, эблэрүүлгын 54 шүүгшэд томилогдонхой.
50 мянганһаа дээшэ ажаһуугшадтай Ивалга аймагта сүүдэй нэгэ участок болон эблэрүүлгын нэгэл шүүгшэ хүдэлдэг. Тиимэһээ энээн тухай хуулида хубилалтануудые оруулха шиидхэбэри абтаһан байна. Буряад Уласай Верховно Сүддэй түрүүлэгшэ Альбина Кирилловагай хэлэһээр, шүүгшын хэһэн ажалай хэмжээн уласай дундазэргын хэмжээнһээ һураггүй ехэ:
«Ивалга аймаг юрэнхыдөө Улаан-Үдэ хотын үргэлжэл болоһон ушарһаа, хүдөө ажахын газарнууд гэр барилгада дамжуулагдана. Тиихэдэ эблэрүүлгын шүүгшэ аймаг дотор бүридхэлдэ абтаһан ажаһуугшадай тооһоо нилээд олон хүндэ туһаламжа үзүүлнэ гэжэ хараада абаха хэрэгтэй. Аймагай дэбисхэртэ оршодог дачын болон саадай 85 эблэрэлгэнүүдтэ Улаан-Үдэдэ бүрилхэлдэ абтаһан, ажал хэдэг хүнүүд зунай сагта ажаһуудаг шалтагаанһаа иимэ байдал тохёолдонхой».
Тиихэдэ Ивалга аймагта Сэлэнгэ мүрэн урдана, Байгалай омолиин загаһанай түрьһэеэ хаяха сагта дүрим эбдэхэ ушар олошорно. Альбина Кирилловагай хэлэһээр, жэлһээ жэлдэ Ивалга аймагта захиргаанай хуули эбдэһэн, эрхэтэдэй болон гэмтэ ябадалай хэрэгүүдэй тоо олошорно. 2017 ондо 9,3 мянганһаа дээшэ хэрэгүүд сүүдтэ хаража үзэһэн байха юм.
42 мянганһаа дээшэ ажаһуугшадтай Сэлэнгэ аймагта сүүдэй гурбан газар ажал ябуулдаг. Үнгэрһэн жэлдэ эблэрүүлгын шүүгшэд 16465 хэрэгүүдые хаража үзэһэн байна.
«Энэ хуулида Сэлэнгэ, Ивалга аймагуудай сүүдэй газарнуудые шэнээр хубааха тухай хэлэгдэнэ. Сэлэнгэ аймагай сүүдэй 2 дугаар участогай ажал болюулжа, Ивалга аймагта 2 дугаар участок байгуулха дурадхал оруулагдана», - гэжэ Альбина Кириллова тайлбарилба.
Тус хуули бэелүүлгэдэ уласай бюджетһээ нэмэлтэ мүнгэн гаргашалагдахагүй юм. Һунгамалнуудай ехэнхи хубинь хуулиин түлөө дуугаа үгэбэ.
