1888
Мүнөөдэр, апрелиин 28-да, Ородой Холбоото Уласай транспортын сайд Максим Соколов албанай хэрэгээр Буряад Улас ерэбэ. Тэрэ «Байкал» аэропортын һэльбэн шэнэдхэлгэ, Улаан-Үдэдэ гурбадахи хүүргэ баригдаха талмай болон Улаан-Үдэ-Турунтаево-Хурамхаан-Шэнэ Уоян харгы барилгада хүрэхэ юм.
Максим Соколовтой хамта Ородой Холбоото Уласай транспортын сайдай орлогшо Александр Юрчик, Агаарай транспортын федеральна агентствын хүтэлбэрилэгшэ Александр Нерадько, «Администрация гражданских аэропортов» гэһэн гүрэнэй эмхиин юрэнхы захирал Юрий Жирков гэгшэд Улаан-Үдэдэ бууба.
Улаан-Үдэдэ ниидэлгэ-буулгын зуруудтай аэродромой һэльбэн шэнэдхэлгэ 2016 оной август һарада эхилһэн юм. Ниидэлгэ-буулгын шэнэ зуруудай утань 3400 метр болоно. Тэрэнэй барилгада 3,9 миллиард түхэриг гаргашалагдаха. Тиихэдэ эндэ элдэб түхэлэй самолёдууд, тэрэ тоодо Boeing болон АН-124 «Руслан» гэһэн томо самолёдууд, бууха аргатай болохо. Ородой Холбоото Уласай Транспортын сайд эндэһээ ажалаа эхилжэ, удаань Буряад Уласай Толгойлогшо Алексей Цыденов болон аэропортын хүтэлбэрилэгшэ Роман Троценко гэгшэдтэй хамта аэровокзалай шэнэ терминал барилгын «түрүүшын шулуу» табилгада хабаадаха юм.
Ородой Холбоото Уласай Транспортын сайд Улаан-Үдэдэ гурбадахи хүүргын баригдаха талмай хараха түсэбтэй. Буряад Уласай ниислэл хотодо гурбадахи хүүргэ барилга Ородой Холбоото Уласай Юрэнхылэгшэ Владимир Путинай даалгабаряар бэелүүлэгдэнэ. 2018 оной май һарада конкурсын дүнгүүдээр түсэлэй түсэблэлгын-гаргаша тоололгын дансануудые бэлдэхэ эмхи элирүүлэгдэхэ юм. Улаан-Үдын Октябрьска болон Железнодорожно аймагуудые холбоохо хүүргын утань 220 метр болоно. Энэ түсэл бэелүүлгэдэ 5,5 миллиард түхэриг гаршалагдаха гэжэ хараалагдана. Удаань Максим Соколов Баргажан аймаг гаража, Улаан-Үдэ-Турунтаево-Хурамхаан-Шэнэ Уоян гэһэн харгын 230-254 модоной зайда хэгдэжэ байһан харгын заһабарилга хараха. Энэ шэглэлэй харгы заһабарилгада федеральна бюджетһээ 600 сая түхэриг һомологдоһон байна.
Буряад Уласай Засагай газарай хэблэлэй албанай гэрэл зураг
