1065
Мүнөөдэр, майн 8-да, Улаан-Үдэ хотодо Илалтын хүшөөгэй дэргэдэ олон зон сугларжа, Эсэгэ ороноо хамгаалгын Агууехэ дайнай баатарнуудай дурасхаал хүндэлөө.
Гүрэнэймнай ажаһуугша бүхэндэ ехэ удха шанартай энэ хэмжээ ябуулгада дайнай болон ара талын ажалай ветеранууд, Буряад Уласай Толгойлогшо Алексей Цыденов, Арадай Хуралай Түрүүлэгшын уялгануудые саг зуура дүүргэгшэ Вячеслав Ирильдеев, Улаан-Үдэ хоты мэр Александр Голков болон олониитэ зон олоороо хабаадаһан байна.
-Буряад оронһоо 120 мянган хүн дайнда мордожо, бүхы фронтнуудта дайсадые бута сохилсоо. Нютагаймнай 43 мянган сэрэгшэд байлдаанай газарнуудта баатарлигаар алдалан унаа. Олон хүн дайнай һүүлээрхи жэлнүүдтэ наһа бараа. Жэл ошохо бүри ветеранууднай үсөөрнэ, - гэжэ уласай хүтэлбэрилэгшэ Алексей Цыденов хэлээ. - Хүндэтэ ветеранууд! Таанадай ашаар бидэ мүнөө жаргалтай ажаһуунабди. Нэрэдэтнай хүрэмэ байха гэжэ оролдодогбди. Бултандатнай энхэ элүүрые, зол жаргал хүсэнэбди. Һайндэрөөр!
Улаан-Үдэ хотын мэр Александр Голков амаршалхадаа, Майн 9 - хүндэтэй һайндэрнүүдэй нэгэн гэжэ тэмдэглээд, ветерануудта үреэлэй һайхан үгэнүүдые зорюулба.
Буряад Уласай Арадай Хуралай Түрүүлэгшын уялга дүүргэгшэ Вячеслав Ирильдеев халуун шулуу долёожо, Агууехэ Илалта шэрээлсэһэн дайнай болон ара талын ветерануудта баярые хүргөө.
Удаань сугларагшад Илалтын хүшөөдэ гүрэмэл сэсэгүүдые табижа, дайнда алдалан унаһан сэрэгшэдэй дурасхаал ёһолон хүндэлөө. Энэ хэмжээ ябуулгада һургуулиин үхибүүд, оюутад, залуушуул хабаадажа, дайнай үеын дуунууд, шүлэгүүд олоор зэдэлээ.
Эхэ ороноо харата дайсанһаа эрэлхэг зоригоор аршалһан, арад зонойнгоо ами наһа абарһан Илалтын сэрэгшэдэй баатаршалга, аша габьяа хэзээдэшье мартагдахагүй, залуушуул, хүүгэд, ерээдүйн олон үеынхидтэ эрхим жэшээ боложо байха.
Анна Огороднигой гэрэл зурагууд
Автор: Любовь ЦЫБЕНОВА
