514
Үнгэрһэн долоон хоногто Буряад Уласай Толгойлогшо Алексей Цыденов албанай хэрэгээр Сэлэнгэ аймагаар ябажа ерээ.
Нэн түрүүн Мария Черных гэгшын гэр бүлын ажахыда хүрэжэ, ажал хэрэгүүдтэйнь танилсаа. Үнгэрһэн жэлдэ энэ ажахы Буряадай Хүдөө ажахын болон эдеэ хоолой яаманай 3 сая түхэригэй грантда хүртэһэн юм. Тэрэ мүнгөөр үхэр мал, хүдөө ажахын техникэ худалдажа абаһан байна. Мария Черных саашадаа жэлэй 80 тонно тухай һү һааха, һү үйлэдбэриин цех байгуулха түсэбтэй.
Уласай Толгойлогшо аймагай малшадтай уулзажа хөөрэлдөөд, мал ажахы хүгжөөлгын хоёр түсэлтэй танилсаа: «100 хонин» болон «MilkandMoney». Энэ хадаа Бандида Хамба лама Дамба Аюшеевэй «ниигэмэй хонин һүрэг» гэһэн программаһаа эхитэй гэхэдэ, алдуу болохогүй. Зүгөөр хоёрдохи түсэлынь һаамхай үнеэдтэ хабаатай.
Удаань Алексей Цыденов сана, ролигоор ябаха харгыда хүрэбэ. Тэрэ 2014 ондо ашаглалгада тушаагдаһан юм. Тэндэ элдэб мүрысөөнүүд үнгэрдэг болонхой. Буряадай Толгойлогшо Галуута нуур һууринай уһа сэбэрлэдэг түхеэрэлгэнүүдтэ хүрэһэн байна. Эдэнь аяар 1939 ондо ашаглалгада тушаагдажа, 1975 ондо һэльбэн шэнэлэгдээ юм. Тиимэһээ сэбэрлэгдэһэн уһанай шанар эрилтэнүүдтэ тааранагүй. Энээнһээ уламжалан, 2020 оной январиин 1 болотор сэбэрлэлгын түхеэрэлгэнүүд шэнээр баригдаха ёһотой.
Алексей Цыденов Гусиноозёрск хотын соёлой «Шахтёр» байшанда аймагай ажаһуугшадтай уулзаба. Ехэнхидээ гэр байрын ажахы, шулуун нүүрһэнэй хэбтэшэ тухай асуудалнууд табигдаа. Үнгэрһэн жэлэйхидэ орходоо, асуудалнууд үсөөн байгаа гэжэ тэмдэглэлтэй. Юуб гэбэл, нёдондоной уулзалгын үедэ Алексей Цыденов аймагай ажабайдалтай танилсажа, зохисотой шиидхэбэринүүдые абаад, тэдэнь бэелүүлэгдэжэ байнхай. Жэшээнь, байгша ондо Новоселенгинскдэ дунда һургуулиин барилга эхилхэ, Жаргалантада соёлой байшан бодхоогдохо. Загастайн һургуули, Харганаада тамирай байшан, түбэй больница заһабарилагдаха. 2018 ондо аймагай хүгжэлтэдэ 527,6 сая түхэриг һомологдохо юм.
- Сэлэнгэ аймагта бэрхэ зон хүдэлнэ. Эршэтэйгээр, эбтэйгээр, үрэ дүнтэйгөөр ажалаа ябуулна. Саашадаашье аймагта аша туһатай түсэлнүүд бэелүүлэгдэхэ гэжэ найданаб, - гэжэ Алексей Цыденов хэлээ.
Буряад Уласай Толгойлогшын болон Засагай газарай хэблэлэй албанай гэрэл зураг
“Буряад үнэн”мэдээсэлэй албан
