1123
Буряад Уласай Арадай Хуралда мүнөөдэр ээлжээтэ бэшэ сесси үнгэргэгдэбэ. Арадай Хуралай сессидэ һунгамал Виктор Абушеев болзорһоо урид һунгамалай бүрин эрхэ тушааба. Тэрэ хадаа нэгэ мандатна 3-дахи һунгуулиин тойрогто һунгагдаһан байгаа. Виктор Абушеевэй һунгамалай бүрин эрхэ тушаагдаһан ушарһаа Буряад Уласай Арадай Хуралай Зүблэлэй бүридэлдэ болон болон бюджедэй хороондо хубилалтанууд оруулагдаа.
Буряад Уласай Арадай Хуралай һунгамал Евгений Ханхалаевай хэлэһээр, Улаан-Үдын Советскэ районой сүүдһээ Арадай Хуралда Виктор Абушеевые гэмнэһэн шиидхэбэриин буулгабари ороһон байна. Буряад Уласай Арадай Хуралай һунгамалай зэргэ тухай хуулиин ёһоор, гэмнэлгын шиидхэбэриин хуулиин хүсэндэ ороһон ушарһаа Виктор Абушеев һунгамалһаа болюулагдаба. Байгша оной март һарада Виктор Абушеев Ородой Холбоото Уласай Гэмтэ ябадалай кодексын 159-дэхи статьягай 4-дэхи хубяар гэмтэй гэжэ шиидхэбэри абтаа гэжэ һануулнабди.
