1327
Буряад Уласай Засагай газарай хэблэлэй албанай гэрэл зураг
Байгша оной июниин 30-да, Ивалга дасанай ипподром дээрэ Буряад уласай соёлой болон спортивна һайндэр “Наадан һур харбаан 2018” эхилһэн байна.
Заншалта ёһоороо, буряад арадай һайндэр мори урилдаагаар нээбэ. Буряад Уласай 10 аймагһаа 80 морид 9 дистанцида мүрысөө.
Һайндэрэй нээлгын баяр ёһололдо ажаһуугшадые болон уласай айлшадые уласай толгойлогшо Алексей Цыденов, хамба лама Дамба Аюшеев, Арадай Хуралай түрүүлэгшын орлогшо Вячеслав Ирильдеев болон Ивалга аймагай хүтэлбэрилэгшэ Виктор Очиров амаршалбад.
Алексей Цыденовай хэлэһээр, Наадан һур харбаан уласай дэбисхэртэ ажаһуудаг бүхы арадуудые нэгэдүүлһэн буряад соёлой, спортын һайндэр болоно.
“Энэ һайндэртэ хүсэ шадалаараа үзэлсэхэ, хэнэй гар шанга, хэнэй нюдэн хурса, хэн эгээл мэргэн, эгээл хүсэтэй байһыень харуулна. Мүн тиихэдэ, энэ үдэр олон зон миин золгожо хөөрэлдэхэ аргатай болоно. Һайндэр уласай олон үндэһэ яһатануудай, бүхы гүрэнэй спорт болон соёлтой дүтөөр танилсуулна”, - гээд уласай толгойлогшо хэлээ.
Байгша оной июлиин 1-дэ, үглөөнэй 9 сагта Түбэй стадион дээрэ һайндэр Һур харбаан наадаар үргэлжэлөө. Харагшад бүхэ барилдаа, һур харбалга, гиревой спорт, буряад шатар, заншалта буряад наада “Һээр шаалган”, “шагай наадан” харабад.
Үдэртөө "Ёохор наадан” гээд уласай залуушуулай үндэһэ яһатанай бүлгэмүүдэй тэмсээн үнгэрөө. Залуушуулай хатарай батл хэгдэбэ.
Бүхыдөө уласай аймаг доторһоо, Улаан-Үдэһөө 800 хүн мүрысөөнүүдтэ хабаадаа.
