​Буряад Уласай Толгойлогшо Алексей Цыденов «Буряад хэлэн XXI зуун жэлдэ» гэһэн хуралда хабаадагшадые амаршалба

«Буряад хэлэн XXI зүүн жэлдэ» гэжэ уласхоорондын хурал эмхидхэгшэд, тэрээндэ хабаадагшад, хүндэтэ айлшад!

Буряад Уласай Засагай газарай болон өөрынгөө зүгһөө хуралай эхилһэн баяраар хани халуунаар амаршалнаб.

Уласхоорондын энэ хурал буряад хэлэ сахин хамгаалха, хүгжөөхэ хэрэгтэ хубитаяа оруул­хаар бэлэн зониие нэгэдүүлнэ. Эндэмнай за­саг зургаануудай ноёд, болбосоролой, ниитын эмхинүүдэй түлөөлэгшэд, Буряад Уласай, Эрхүү можын, Үбэр Байгалай хизаарай, Монгол оро­ной, Хитад гүрэнэй эрдэмтэд ороно.

Байгша ондо гүрэнэй Юрэнхылэгшэ түрэлхи хэлэ шудалха тухай хуулида гараа табиба. Тиин Ородой Холбоото Уласай эрхэтэд түрэлхи хэлэн дээрээ ном үзэхэ аргатай болобо.

Буряад Уласта буряад хэлэ хүгжөөхэ гүрэнэй хүтэлбэри бэелүүлэгдэжэ байна. Эрхүү можын, Үбэр Байгалай хизаарай, Бу­ряад Уласай Болбосоролой яаманууд хоорондоо “Буряад хэлэ сахин хамгаал­ха, хүгжөөхэ хэрэгтэ хүсөө хамтадхаха тухай” хэлсээ баталба.

Ёһо заншал, аман зохёолгүйгөөр буряад хэлэн хүгжэхэгүй гэжэ ойлгосотой. Тэдэниие дэмжэн, Буряад Уласта Буряад хэлэнэй үдэр жэл бүхэндэ тэмдэглэгдэнэ. “Буряад-ФМ” радио, “Сэлэнгэ” теле-субагай бии болоһонһоо уламжалан, буряад хэлэн дээрэ гарадаг дамжуулганууд олон болоо. Интер­недтэ һуудаг олониитэ буряад хэлэ урданайхиһаа ехээр хэрэглэжэ захалаа. Гэбэшье, эдэ шэглэлнүүдээр бүтээхэ ажал үшөөл ехэ.

Буряад хэлэ хүгжөөхэ үргэн түсэб зохёолго хадаа энэ хуралай гол зорил­гонь болоно. Ород гүрэнэй нютаг можонуудта, мүн хилын саанашье буряад хэлэ хүгжөөн һалбаруулхын тула юу хэлтэйб гэжэ асуудалда мэргэжэлтэдһээ бүридэһэн ниигэм харюу олгохо зэргэтэй.

Энэ хуралда хабаадагша хүн бүхэндэ аша үрэтэйгөөр хүдэлхыень хүсөөд, табиһан түсэбтнай бэелэг лэ гэжэ үреэнэб!

Буряад Уласай Толгойлогшо А.С. ЦЫДЕНОВ