1735
Буряад Уласай Толгойлогшо Алексей Цыденов Түнхэн аймагаар албанай хэрэгээр ябажа, ниигэмэй-эдэй засагай һалбариин эмхинүүдтэ хүрэжэ, Хэрэн һууринда ажаһуугшад болон ТОС-ой эдэбхитэдтэй уулзаа. Тиихэдээ уласай хүтэлбэрилэгшэ энээнһээ урид Түнхэнэй аймагаар албанай хэрэгээр ябахадаа, үгтэһэн зарлигууд хэр бэелүүлэгдэнэб, гэжэ шалгажа, шэнэ шиидхэбэринүүдые абаһан байна.
2017 оной июль һарада Алексей Цыденов Түнхэн аймагаар ябахадаа, Хэрэн һууринда хүүгэдэй поликлиникэ бариха гэһэн даабари үгэһэн байна. Шэнэ байшан барилгада уласай бюджетһээ 19,2 сая мүнгэн һомологдожо, 4,5 һарын туршада барилга хэгдээ. Шэнээр баригдаһан хүүгэдэй поликлиникэдэ уласай хүтэлбэрилэгшэ хүрэһэн байна. Тус эмнэлгын газарта УЗИ-шэнжэлэл хэхэ, шүдэ аргалха таһагууд хүдэлнэ.
Түнхэн аймагай заһабарилагдаха хэдэн һургуулида Буряад Уласай Толгойлогшо хүрэбэ. Тиихэдэ Ю.П. Седовой нэрэмжэтэ Түнхэнэй дунда һургуулида 2,5 сая түхэригэй заһабари хэгдээ, хэгдэһэн ажалай түлөө уласай хүтэлбэрилэгшэдэ тоосоһон байна. Горхоной дунда һургуулиин тамирай танхимай заһабарилгада уласай бюджетһээ 3,6 сая түхэриг һомологдоо. Байшанда заһабарилга хэгдээ, тхэквондогой секци хүдэлжэ эхилээ. Алексей Цыденовэй тэмдэглэһээр, тамирай танхим заһабарилга Алас Дурнын тойрогой үзүүлһэн тэдхэмжээр үргэлжэлүүлэгдэхэ.
- Эдэй засагай хүгжэлтын газарта ниигэмэй асуудалнуудые шиидхэлгэдэ тэдхэмжэ үзүүлэгдэнэ. Түнхэн аймагта наранай обсерваториин түсэл болоно. Элүүрые хамлгаалгын, соёлой һалбаринуудта тэдхэмжэ үзүүлэгдэхэ. Хэрэнэй соёлой байшан Алас Дурнын тойрогой тэдхэмжээр хэгдэхэ гэжэ мэдүүлгэ орууланхайбди, - гэжэ уласай хүтэлбэрилэгшэ хэлэбэ.
Түнхэнэй дархан газарай хилын талаар асуудалай шиидхэгдэхэ болзор тухай Алексей Цыденов тодорхойлбо:
- Дархан газарай хилын талаар дансануудые суглуулжа, Ородой Холбоото Уласай Байгаалиин яаманда оруулһан байнабди. Ородой Холбоото Уласай Засагай газарай Түрүүлэгшэ Дмитрий Медведев Алас Дурнын тойрогто бүрин эрхэтэ түлөөлэгшэ Юрий Трутневтэ 2019 оной апрелиин 1 болотор дарха газарай хилэ гуримшуулһан тогтоол Засагай газарта оруулагдаха ёһотой гэжэ даалгаа.
Түнхэн аймагта ТОС-уудай хүсөөр баригдажа байһан объектнүүдтэ хүрөө. Аймагай дэбисхэртэ 72 ТОС ажалаа ябуулна, тэдэнэй ажалда 1230 хүн хабаадана.
Түнхэн аймагай ажаһуугшадтай уулзалгада Буряад уласай эдэй засагай сайдай орлогшо Елена Тыжинова хабаадаа. Тэрэнэй тэмдэглэһээр, 2018 ондо уласай бюджетһээ аймагай хүгжэлтэдэ 174,9 сая түхэриг һомологдоо, тэрэ тоодо «Тунка - площадка солнечного телескопа к с.Улбугай» гэһэн харгыда, Хэрэнэй түбэй номой сангай ехэ заһабрида, хүүгэдэй урлагай һургуулида, хүдөөгэй 4 соёлой байшанда, болбосоролой 16 эмхинүүдтэ мүнгэн тэдхэмжэ үзүүлэгдээ. Тиихэдэ 2019 ондо Түнхэн аймагай дэбисхэртэ бэелүүлхэ түсэбүүд тухай Елена Тыжинова тэмдэглэбэ. Байгша ондо Аршаан һууринда 450 һууритай һургуулиин барилга эхилхэ, харгы, хүүргэ заһабарилагдаха,
Мүнөөдэр Буряадай Толгойлогшо Аха аймагта ажалаа үргэлжэлүүлнэ. ТОС-ой хүсөөр баригдаһан соёлой байшан болон хүүгэдэй сэсэрлигтэй уласай хүтэлбэрилэгшэ хүрэхэ. Тиихэдэ уласай хүтэлбэрилэгшэ фермерскэ ажахынуудта, ниигэмэй эмхинүүдтэ, харгын хангалгын байгууламжын объектнүүдтэ хүрэхэ түсэбтэй. Өөрлиг һууринда һоёдуудай соёлой түб нээлгын баяр ёһололдо хабаадажа, ажаһуугшадтай уулзаха юм.
