868
Буряад Уласай Толгойлогшо Алексей Цыденов мүнөөдэр, мартын 26-да, Ородой Холбоото Уласай Гүрэнэй зүблэлэй «Экологи болон байгаалиин нөөсэнүүд» болон «Транспорт» гэһэн шэглэлнүүдэй суглаанда хабаадана. Энэ хэмжээ ябуулга Москва хотодо эмхидхэгдэнэ.
Алексей Цыденов «Транспорт» гэһэн ажалай бүлэг хүтэлбэрилжэ, «Экологическая реабилитация водных объектов» гэһэн бүлэг залан хүтэлбэрилнэ. Ородой Холбоото Уласай Юрэнхылэгшэ Владимир Путинай майн тогтоолнуудай хэмжээндэ бэелүүлэгдэдэг үндэһэтэнэй түсэлнүүдтэ Байгал далай сахин хамгаалха талаар асуудалда онсо анхарал хандауулагдана. Тиимэһээ «Байгал далай сахин хамгаалга» гэһэн федеральна түсэл бэелүүлэгдэхэ юм. Тэрээнһээ гадуур, «Экология» гэһэн үндэһэтэнэй түсэлдэ федеральна 10 түсэл оронхой: «Сэбэр гүрэн», «Бог шорой суглуулха, усадхаха талаар комплексно ажал», «Внедрение наилучших доступных технологий», «Сэбэр уһан», «Инфраструктура для обращения с отходами I-II классов опасности», «Сэбэр агаар», «Онсо шухаг уһанай объектнүүдые сахин хамгаалга», «Ой сахин хамгаалга», «Оздоровление Волги» .
«Сэбэр гүрэн» гэһэн федеральна түсэлөөр Буряад Уласта хуули бусаар бог шорой обоолһон табан газар усадхагдаха. Байгал далай сахин хамгаалга» гэһэн федеральна түсэлэй хэмжээндэ байгаалида хохидол үзүүлһэн Холбольджинскэ шулуун уурхай болон Улаан-Үдын Стеклозаводой үйлэдбэриин үлэгдэл усадхагдаха юм. Тиихэдэ Байгал далайда омоли загаһанай түрьһэ табиха, сэбэрлэлгын түхеэрэлгэнүүдые бариха гэжэ түсэблэгдэнхэй. Мүнөө Улаан-Үдын сэбэрлэлгын түхеэрэлгэнүүдые һэльбэн шэнэдхэхэ түсэл бэелүүлэгдэнэ.
Буряад Уласта «Ой сахин хамгаалга» гэһэн федеральна түсэлэй хэмжээндэ ой модо тариха, түймэр саралгын техникэ шэнэлхэ гэжэ түсэблэгдэнхэй. Энэ түсэл бэелүүлгэдэ түрүүшын гурбан жэлдэ уласта 546 сая түхэриг һомологдохо гэжэ хараалагдана. Байгша оной түймэрэй аюултай хаһын эхилтэр 135 сая түхэригэй түймэр саралгын 30 техникэ абтаха юм. Тон түрүүн Бэшүүр, Захаамин, Хяагта, Хурамхаан аймагуудта шэнэ техникэ дамжуулагдаха.
Уластамнай харгы заһабарилгада «Аюулгүй, һайн шанартай автоунаагай харгынууд» гэһэн үндэһэтэнэй түсэлөөр 2024 болотор 17,2 миллиард түхэриг дамжуулагдаха.
Ородой Холбоото Уласай Гүрэнэй зүблэлэй ажалай бүлэг бүхэн суглаанда бэлдэжэ, можо нютагуудта түсэлнүүд хэр зэргэ бэелүүлэгдэнэб гэжэ шэнжэлжэ, сэгнэлтэ үгэнэ. Тиихэдэ Ород гүрэнэй можо нютагуудай засаг зургаанай ажаябуулга гуримшуулха талаар дурадхалнуудые оруулжа, гүрэнэй болон муниципальна хүтэлбэриин эрхим жэшээнүүдые дэлгэрүүлнэ. Холын хараата хүгжэлтын болон үндэһэтэнэй түсэлнүүдэй талаар Ородой Холбоото Уласай Юрэнхылэгшын дэргэдэхи Зүблэлэй президиумтай няагта хараилсаатайгаар эдэ бүлэгүүд ажалаа ябуулха түсэбтэй.
Мартын 27-до, Ородой Холбоото Уласай Тоололгын танхимай түрүүлэгшэ Алексей Кудрин можо нютагуудай амбан захирагшадтай уулзажа, суглаа үнгэргэхэ. Энэ хэмжээ ябуулгада Буряадай Толгойлогшо Алексей Цыденов хабаадаха юм.
Буряад Уласай мэдээсэлэй албанай гэрэл зураг
