1750
Байгал далайда омоли загаһанай тоо түргэн олошоруулха гэжэ тэрэниие бариха огто хорихо гэһэн дурадхал Буряад уласта оруулаа.
Ородой Холбоото Уласай хүдөө ажахын сайдай орлогшо - Загаһа бариха талаар федеральна агентствын хүтэлбэрилэгшэ Илья Шестаковай хүтэлбэри доро «Байгал далайда омоли загаһа олошоруулха арганууд тухай» гэһэн суглаан мүнөөөдэр, мартын 29-дэ, үнгэрбэ. Энэ суглаанда хойто аймагуудай үсөөн тоото үндэһэн арадуудай загаһа бариха зүбшөөлэй талаар асуудал гараһан байна.
Росрыболовствын Ангара-Байгалай дэбисхэрэй хүтэлбэриин уялга дүүргэгшэ Роман Гармаевай хэлэһээр, загаһа бариха зүбшөөл олоной һонирхол татана.
- Манай һанахада, эндэ худалдаа-наймаанай һабагшатай. Хойто аймагуудай үсөөн тоото арадуудай нэгэдэлнүүд олон болоно. Үсөөн тоото арадуудта хүнүүд нээрээһээ хабаатай гү гэжэ элирүүлхын аргагүй. Үндэһэн арадуудай ажабайдал худалдаа-наймаанай харилсаанда хэрэглэгдэхэ ёһогүй. Хуули бусаар баригдаһан загаһан саашаадааүсөөн тоото арадуудай нэгэдэлнүүдэй дансануудаар наймаалагдана, - гэжэ Роман Гармаев хэлэбэ.
Тиигэжэ загаһа ехэ хэмжээндэ бариха хорюулһаа гадуур, үсөөн тоото арадуудай нэгэдэлнүүдтэ загаһа худалдаха хорюул абаха тухай тэрэ дурадхаба.
- 2017 ондо загаһа бариха хорюулай абтахада, энэ талаар байдалай һайн болоогүй һаань, саашадаа үшөө хубилалтануудые оруулха тухай хэлсэһэн байнабди. Хуулиин дансануудые дахин үзэжэ, зохихо хубилалтануудые оруулха ёһотойбди. Үгы гэбэл, омоли загаһа олошоруулха талаар байдал хубилхагүй, - гэжэ Илья Шестаков хэлэбэ.
Энэ асуудалааор уласай хэмжээндэ ажал ябуулха, тиихэдээ хойто аймагуудай үсөөн тоото арадуудай эрхэ хаһагдаха ёһогүй гэжэ федеральна сайд тэмдэглэбэ.
Байгал далайда омоли загаһанай тоо түргэн олошоруулха гэжэ тэрэниие барихаяа огто хориһон тухай хуулиин абтабал, хойто аймагуудай үсөөн тоото арадуудта загаһа барихазүбшөөлэй орондо мүнгэ түлэхэ тухай асуудалаар хэлсэхээр бэлэмди гэжэ Буряад Уласай Толгойлогшо Алексей Цыденов харюусаба.
- Хуули бусаар баригдаһан загаһан саашадаа үсөөн тоото арадуудай нэгэдэлнүүдэй дансануудаар наймаалагдахагүйн тула, тэдхэмжэ түлэхэбди. Тиихэдэ наймаанда байһан омоли загаһан хуули эбдэһэн ушар болохо, - гэжэ уласай хүтэлбэрилэгшэ тэмдэглэбэ.
