1407
2019 ондо Буряад Уласай Аха аймагта Алас Дурнын тойрогой тэдхэмжын хэмжээндэ 24 саяһаа дээшэ мүнгэн һомологдожо, хүүгэдэй сэсэрлиг болон хоёр эхин һургуули-хүүгэдэй сэсэрлиг заһабарилагдаха.
Сорог тосхоной «Улыбка» гэһэн хүүгэдэй сэсэрлиг «арадай барилгын» ашаар аяар 1973 ондо баригдаһан байна. 2015 онһоо энэ сэсэрлиг хаагданхай. Тиигэжэ үхибүүд - һургуулиин интернадта, бүри багашуулынь Сорогой амбулаторидо сэсэрлигтэ ябана. 45 үхибүүдэй мүнөө ябажа байһан сэсэрлиг СанПиНай эрилтэнүүдтэ тааранагүй гэжэ ойлгосотой.
«Улыбка» гэһэн хүүгэдэй сэсэрлигэй байшанда уһанай, канализациин соргонуудгүй, хушалта, таһалгануудынь үмхирэнхэй, бэеын тамирай, хүгжэмэй, эмнэлгын, методикын танхимууд үгы юм. Эдеэ хоол шанадаг газарай талмайнь бага. Тиигэжэ мүнөө үеын эрилтэнүүдтэ таараһан хүүгэдэй сэсэрлиг заһабарилгада 14,5 саяһаа дэээшэ мүнгэн шэглүүлэгдэхэ.
Аха аймагта бүхыдөө 5 сэсэрлиг бии, тэндэ 430 үхибүүд ябадаг. Тиихэдэ эхин һургуулинуудта хүүгэдэй сэсэрлигүүдэй 3 бүлэг хүдэлдэг. Тэрэ тоодо, Хара-Хужар, Боксон һууринуудта 32 үхибүүн сэсэрлигтэ ябана.
Боксоной эхин һургуули-сэсэрлигэй байшан 1991 ондо баригдаһан. Теэд энэ байшан ехэ хүйтэн, үбэлэй янгинама хүйтэндэ хэдышье түлэгдэжэ байгаа һаа, оройдоол 11,12 градус дулаан болодог. Энэ байшан заһабарилгада 5,3 саяһаа дээшэ мүнгэн дамжуулагдаха.
Хара-Хужарай эхин һургуулида 18 хүн һурадаг. 1988 ондо баригдаһан байшан баһал хүйтэн. Тэрэнэй заһабарилгада 4,5 сая түхэриг һомологдохо.
Буряад Уласта хүүгэдэй сэсэрлигүүдые һэльбэн шэнэлхэ талаар адал үргэлжэлүүлэгдэхэ. Ородой Холбоото Уласай Юрэнхылэгшын Нөөсын жасаһаа һомологдоһон 115 сая түхэригтэ улас дотор 2018 ондо хүүгэдэй 4 сэсэрлиг заһабарилагдаа. «Болбосоролой һалбари хүгжөөлгэ» гэһэн программын хэмжээндэ 174,3 сая түхэригтэ болбосоролой 26 эмхи һэлбюэн шэнэлэгдээ. Тэрэ тоодо, Аха аймагай Балактын эхин һургуули-сэсэрлиг заһабарилагдаһан байна.
Буряад Уласай Засагай газарай мэдээсэлэй албанай гэрэл зураг
