1141
Засаг зургаанай түлөөлэгшэд талаан бэлиг хүгжөөхэ хэрэгтэ туһа хүргэжэ, арад зонтой нягта харилсаатай хүдэлхэ ёһотой гэжэ уласай хүтэлбэрилэгшэ ажаһуугшад болон Арадай Хуралда хандаһан захилдаа тэмдэглэбэ.
«Засаг зургаанай хүтэлбэрилхэ маяг хубилжа, арадта дүтэ байха шухала. Ажаһуугшадтай ууулзахаһаа гадуур, интернет сүлжээндэ харилсаха арга байна ха юм. Үнгэрһэн жэлдэ «Инцидент-менеджмент» гэһэн ниигэмэй сүлжээн шалгаха системэ, «Активный Гражданин» гэһэн программа хүдэлжэ эхилһэн байна. Эндэ ороһон гомдол, хандалгануудаар асуудалнуудые шууд шиидхэхэ зорилготойбди», - гэжэ Алексей Цыденов хэлэбэ.
Буряад Уласай Толгойлогшын хэлэһээр, уласай аймаг бүхэнөөр ябажа, «холо оршодог багаханшье сомонуудай ажаһуугшадтай уулзажа, тэдэнэй байдал өөрынгөө нюдөөр хараха» гэһэн зорилго өөртөө табина.
Тиихэдэ гараһан асуудалнуудые шиидхэхэ талаар сайдууд болон аймагуудай хүтэлбэрилэгшэд харюусаха гэжэ Алексей Цыденов тэмдэглэбэ.
«Мэхэ гохо, үлүү үгэ гаргангүй, хоорондоо хэрэлдэнгүй, урагшаа дабшаха ёһотойбди. Уласай хүгжэхын тула Засагай газарай гэшүүд болон аймагуудай хүтэлбэрилэгшэд дүй дүршэлтэй байжа, өөдынгөө ажалай түлөө дүүрэн харюусаха ёһотой», - гэжэ Буряадай Толгойлогшо онсолбо.
Буряадай ниислэл Улаан-Үдэ хото онсо зэргэтэй гэжэ Алексей Цыденов тэмдэглэжэ, Улаан-Үдын захиргаанай хүтэлбэрилэгшын уялга дүүргэгшэ Игорь Шутенковые дэмжэхэ тухайгаа мэдүүлээ.
«Хоёр жэлэй туршада суг хүдэлжэ, энэ хүн ажал хэжэ шадаха, харюусалга абаха, асуудалнуудые шиидхэхэ гэжэ ойлгооб. Ниислэл хотодо бэелүүхэ зорилгонууд бэлэн бэшэ, ехэ барилганууд ябуулагдаха, хото хубилгагдаха. Засагай газаратй суг хамта хүдэлжэ, ажаһуугшадай дэмжэлгээр Игорь Шутенков ажалаа урагшатай ябуулха гэжэ этигэнэб», - гэжэ уласай хүтэлбэрилэгшэ хэлэбэ.
Буряад Уласта шиидхэхэ орёо асуудалнууд олон, хүн бүхэнэй оролдолгоор, ехэ ажал бүтэхэ гэжэ Алексей Цыденов онсолбо.
«Хэгдэхэ ажалай шата бүхэнэй түлөө харюусажа, һайн дүнгүүдые туйлаха гэжэ ажалаа эршэдүүлхэ шухала. Харюусахаар бэлэн бэшэ хүнүүд, юрэнхылэгшын хэлэһээр, «дүтэлөөшьегүй һаань дээрэ». Үндэһэтэнэй түсэлнүүдэй ашаар улас дотор байдал хубилгажа, үхибүүд, аша гушанартаа, ерээдүйн зондо орхихо юумэтэй байхабди. Хамтадаа ажал ябуулжа, хэрэгүүдээ бүтээхэбди», - гэжэ уласай хүтэлбэрилэгшэ тобшолбо.
Буряад Уласай Засагай газарай мэдээсэлэй албанай гэрэл зураг
