1465
Буряад Уласай Толгойлогшо Алексей Цыденов болон Засагай газарай түлөөлэгшэд албанай хэрэгээр Зэдэ аймагаар ябажа, ниигэмэй объектнүүдтэ хүрэжэ, ажаһуугшадтай уулзаһан байна.
Белоозерск-Енхор харгыда Зэдэ гол дээгүүр гараха хүүргэ 1967 ондо баригдажа, үмхиржэ, аюултай болоһоншье һаань, тэндэ машинанууд гараһаар. Энэ хүүргэ аймагай түб гурбан һууринуудтай, Зэдэ аймаг Хяагта аймагтай холбоно. Эндэһээл уласай хүтэлбэрилэгшэ ажалаа эхилжэ, хүүргэ заһабарилжа, модон тулгануудые түмэрөөр һэлгэхэ тухай даалгаба.
- Иижэ ашаглагдажа байхадаа, энэ хүүргэ удаан байхагүй. Байгша ондо хүүргэдэ ехэ заһабари хэжэ, хилэ сахигшадта шулуун нүүрһэ шэрэхэ ондоо арга хараалхабди. Эрье бүхэлхэ талаар асуудал шиидхэхэ хэрэгтэй. Энэ асуудал шиидхээгүй һаа, хүүргэ ондоо тээ бариха болохобди, - гэжэ Алексей Цыденов хэлэбэ.
Фермернүүдтэй уулзалга
Буряад Уласай Толгойлогшо Зэдын дунда һургуулиин хүдэлмэрилэгшэдтэй уулзажа, удаань аймаг дотор хүдөө ажахы хүгжөөхэ асуудалнуудаар Белозерско һургуулида зүблөө үнгэргэһэн байна. Ган гасуур жэлнүүдэй гаргашын талаар тэдхэмжэ, газарай татабариин сэн доошолуулха, нооһо худалдажа абаха, хүдөө ажахынуудта урьһаламжа үгэхэ болон бусад шухала асуудалнуудаар зүблөөндэ хэлсэһэн байна.
Олзын хэрэг эрхилэгшэдые дэмжэдэг «Мой бизнес» гэһэн түбэй туһаламжа үзүүлдэг аргануудтай Алексей Цыденов фермернүүдые танилсуулаа.
- Олзын хэрэг эрхилэлгэ дэмжэхэ элдэб арганууд бии. Жэшээнь, таанар, 3 жэлээр 10%-тэй 5 сая түхэригэй урьһаламжа абаха аргатайт, - гэжэ Алексей Цыденов тэмдэглэбэ.
2018 ондо уласай бюджетһээ фермернүүдые дэмжэлгэдэ 94 сая түхэриг һомологдоһон байна.
Зэдэ аймагай ТОС-ууд
ТОС-ой хүсөөр шэнэлэгдэһэн Доодо Үшөөтэйн соёлой байшанда Буряадй Толгойлогшо хүрэһэн байна. Тус эмхидэ ехэ заһабари хэлгэдэ 1,7 сая түхэригэй тэдхэмжэ үзүүлэгдээ. Мүнөө Зэдэ аймагай ТОС-уудта 3 мянганһаа дээшэ хүн оронхой, 87 ТОС ажалаа эрхилнэ. Тэдэнэй хүсөөр түймэр саралгын 2 депо баригдаа, соёлой хоёр байшан, хүүгэдэй наадаха дүшэнһөө дээшэ талмай заһабарилагдаа. ТОС-уудай эдэбхитэдэй хандаһанай удаа, Алексей Цыденов соёлой байшанай актова заал һандалинуудтай болгохо талаар асуудал шиидхэхэ гэжэ соёлой яаманда даалгаба.
Петропавловкын түбэй больница
Буряад Уласай Толгойлогшо Алексей Цыденов Петропавловкын түбэй больницын корпусуудые шалгаһан байна. Петропавловкын түбэй больницын бүридэлдэ 29 эмхи хүдэлдэг. Алас Дурнын тойрогой тэдхэмжын хэмжээндэ энэ больницада эмнэлгын хэрэгсэлнүүд шэнэлэгдэхэ. 2019 ондо 25 сая түхэригэй цифровой рентген аппарат Петропавловкын больницада абтаха юм.
Зэдэ аймагай ажаһуугшад
Зэдэ аймагта хүгжэлтын түбтэй аймагуудай тоодо ороогүй. Тиимэһээ Алас Дурнын тойрогой тэдхэмжэ үзүүлэгдэхэгүй.
- Алас Дурнын тойрогой тэдхэмжэхүгжэлтын түбтэй аймагуудта үзүүлэгдэнэ. Аймаг бүхэндэ хүгжэлтын һалбари байха ёһотой, энэ хадаа ганса минии, яамануудай зорилго бэшэ, харин аймагуудай хүтэлбэрилэгшэдэйшье зорилго болоно, - гэжэ Алексей Цыденов онсолбо.
Удаань уласай хүтэлбэрилэгшэ Петропавловкын соёлой байшанда ажаһуугшадтай уулзажа, асуудалнуудтань харюусаа. Тиихэдэ олон үхибүүтэй 6 гэр бүлэдэ гэр абаха үнэмшэлгэнүүдые байрюулаа.
Захаамин аймагта
Мүнөөдэр, апрелиин 30-да, Алексей Цыденов Захаамин аймагта ажалаа үргэлжэлүүлхэ юм. Закаменск хотодо котельни бариха асуудалаар зүблөөн үнгэргэгдэхэ гэжэ түсэблэгдэнхэй. Удаань шахтын ажалда заһабарилгын тоног хэрэгсэлнүүдые үйлэдбэрилдэг «Литейщик» бүлгэм, хүүгэдэй сэсэрлиг, хүрэхэ түсэбтэй. Удаань уласай хүтэлбэрилэгшэ хүдөө ажахы эрхилэгшэдтэй болон ажаһуугшадтай заншалта ёһоор уулзаха.
Буряад Уласай Засагай газарай мэдээсэлэй албанай гэрэл зураг
