​​Буряад Уласай Толгойлогшо Алексей Цыденов - олондо эрилтэтэй сэсэрлигтэ

Буряад хэлэ үзэдэг хүүгэдэй сэсэрлигүүд Зэдэ аймагта үсөөн. Петропавловка һууринай “Малыш” гэһэн хүүгэдэй сэсэрлигтэ шэнэ гуримаар түрэлхи хэлэн заагдана.

Буряад Уласай Толгойлогшо Алексей Цыденов тэндэ хүрэжэ, байра байдалтайнь танилсаба. Бүлэг бүхэндэ һонирхолтой хэшээлнүүдые Толгойлогшодо харуулаа.

Аймагай һуралсалай таһагые даагша Николай Федотовой хэлэһээр, “Малыш” сэсэрлигтэ 235 үхибүүн хүмүүжүүлэгдэнэ. Харин байшаниинь оройдоол 144 үхибүү багтаахаар баригдаатай бшуу.

- Манай аймагай, илангаяа Петропавловкын хүн зон үхибүүдээ “Малышта” ябуулхаяа һанадаг. Юуб гэхэдэ, эндэмнай залуу бэрхэ хүмүүжүүлэгшэд хүдэлдэг. Эбтэй эетэй хүдэлмэрилэгшэд һайн мэдэсэ багашуулда үгэдэг гэжэ суутай. Тиимэһээ бүлэг бүхэнөө ехэ болгообди. Нэгэ бүлэгтэ 40 үхибүүн тоологдоно, - гэжэ Николай Васильевич мэдүүлнэ.

Буряад хэлэ хүгжөөжэ байһан энэ сэсэрлигэй байшануудые заһабарилха хэрэгтэй. Хушалтыень һэлгэхэ, ханыень дулаасуулха талаар ажал хэгдэхэ болоно.

Аймагай эрдэм һуралсалай таһагые даагшын хэлэһээр, Петропавловкада шэнэ сэсэрлиг бариха тухай асуудал үнинэй бодхоогдонхой. Барилгын газар түсэблэгдэнхэй. Мүнөө дээрээ проект зохёогдожо байна. 120 һууритай шэнэ сэсэрлигтэ ехэнхидээ 1-3 наһанай үхибүүд ябахаар хараалагдана.

Авторай гэрэл зураг