​Буряад Уласай Зэдэ аймагай Доодо Үшөөтэйн соёлой шэнэ байшанда Алексей Цыденов ажаһуугшадтай уулзаба

Зэдэ аймагай Доодо Үшөөтэй һууринда арадай хүсөөр баригдаһан соёлой шэнэ байшан 2018 оной декабрь һарада үүдэеэ сэлиһэн байна. Энэ барилга бүтээһэн ажаһуугшадтай Буряад Уласай Толгойлогшо Алексей Цыденов һаяхана уулзаба.

Соёлой байшаниие даагша Мария Сапкеевагай хэлэһээр, Доодо Үшөөтэйдэ соёлой байшан 1989 ондо баригдабашье, хана үһээниинь үмхирһэн байгаа. 10 гаран жэлэй туршада нютагай зон найр наадануудаа эхин ангиин һургуулида үнгэргэдэг болоо.

- Һургуулиингаа байшанда томо-томо хэмжээ ябуулга эмхидхэхэ аргагүй байгаабди. Зунай хаһада стадион дээрээл суглардаг һэмди, - гэжэ Мария Васильевна Сапкеева хөөрэнэ.

Багахан энэ һууринда аяар 9 ТОС тоологдоно. Эгээл тэдэнэй ашаар соёлой шэнэ байшан бариха тухай шиидхэбэри абтаа. Буряадай Арадай Хуралай һунгамалнууд Виктор Абушеев болон Сергей Пашинский мүнгөөр туһаламжа үзүүлээ. Энэ хэрэгтэ ТОС бүхэн өөрын мүнгэ һомолһон байна. Тиихэдэ сомоной даргын һунгалтын үедэ Сэсэгма Николаевна Цыбенова заабол соёлойнгоо байшаниие бодхоохобди гэжэ нютагаархидаа найдуулаа бэлэй.

- Хуушан байшанаа һуури хүрэтэрнь задалаабди. Бүхы сугларһан мүнгөөрөө брус абажа, шэнээр бодхоогообди. Байшанай дундахи хаяануудые урдахи клубһаа үлэһэн модоор хэһэн байнабди. Манай нютагай зон барилгын үедэ бэе бэеэ һэлгэн, хүдэлмэрилэгшэдые эдеэлүүлжэ байгаа. Иигэжэ хамтын хүсөөр соёлой байшантай болообди, - гэжэ Мария Васильевна баяртайгаар хөөрөөгөө үргэлжэлүүлнэ.

Клубай шэнэ байшанай зал 120 хүниие багтааха аргатай. Томо фойедэ хатар наадан үнгэргэхөөр түсэблэгдэнхэй. Нютагай зоной наадахынь тула тусхай таһалга хэгдэнхэй. Тэндэ мүнөө шэрээгэй теннисээр хүн зон һорилго хэнэ. Соёлой байшанай хүтэлбэрилэгшэдэй хэлэһээр, бильярд абахаар түсэблэгдэнэ. Үшөө нэгэ таһалгые нютагай номой сан эзэлнэ.

Клавдия Бадмажапова

- Манай номой сан 1959 ондо баригдаһан байшанда оршодог һэн. Харин мүнөө дулаахан, һаруул таһалгада орообди. Номой сангай дэргэдэ нютагайнгаа үндэр наһатайшуулые суглуулжа, Зэдынгээ талын хуушан дуунуудые, арадайнгаа аман зохёол һэргээн хүгжөөнэбди. Мүн тиихэдэ багашуулаа урижа, элдэб юумэнүүдтэ һургажа байдагбди, - гэжэ номой сангые даагша Клавдия Львовна Бадмажапова хөөрэнэ.

Номой санда хирэ-хирэ болоод лэ, шэнэ номууд ерэжэ байдаг. Хэды тиигэбэшье Алексей Цыденов номоор хангалгада туһа хүргэхэ даабари Буряад Уласай соёлой сайд Соёлма Дагаевада даалгаа. Мүн тиихэдэ томо залда һандалинууд хэрэгтэй болоно.

Доодо Үшөөтэй һууринда соёлой шэнэ байшан барилгаһаа Буряадай түрүүшын эрдэмтэн Доржо Банзаровай 200 жэлэй ойн баярай хэмжээ ябуулганууд эхиеэ абаба гэжэ хэлэхэ хэрэгтэй. Энэ ушараар эхин классай һургуулиин захирал Мидагма Сергеевна Гомбожапова багахан музейгээ заһабарилха түсэбтэй байһанаа мэдүүлбэ. Теэд энэ хэрэгтэ мүнгэн дуталдана.

- Доодо Үшөөтэй һууринда Доржо Банзаровта хүшөө табигданхай, тэрэнь муу шанартай гипсээр бүтээгдэһэн байшоо. Манай нютагта энэ хүшөө һаяхана, 2010 ондо баригдаһаншье һаа, хүн зоной һанаа зобооно. Юундэб гэхэдэ, тэрэниие ходо заһабарилжа байха хэрэгтэй болоно. Тиимэһээ энэ хүшөө шэнэлжэ, хүрэл түмэрөөр хээ һаамнай, һайн лэ байгаа, - гэжэ нютагай аха захатан Сэнгэ Жундуевич Дашижапов хөөрэнэ.

Сэнгэ Дашижапов

Буряад ороноо суурхуулһан мэдээжэ эрдэмтэн Доржо Банзаровай түрэһөөр 200 жэлэй ойн баярые үнгэргэлгын эмхидхэлэй хороониие хүтэлбэрилхыень Алексей Цыденовтэ Доодо Үшөөтэй һууринай эдэбхитэд хандаһан байна. Тус хэмжээ ябуулга 2022 ондо болохоор хараалагдана.

Авторай гэрэл зурагууд