​​Хүүгэд шэнэ сэсэрлигүүдтэ хүмүүжүүлэгдэхэ

Мүнөө үедэ олонхи хүүгэд хүгшэдэйнгөөл харууһан доро байна

Буряад Уласта хүүгэдэй сэсэрлигүүд болон һургуулинуудай барилга хэзээшье иимэ олоор эрхилэгдэжэ үзөөгүй юм. 2021 оной дүүрэтэр аяар 24 сэсэрлиг бодхоогдохоор хараалаг­данхай. Тэдэнэй хоёрынь һаяхана ашаглалгада тушаагдаа.

Хүүгэдэй сэсэрлигүүдэй барил­гада “Болбосорол хүгжөөлгэ” бо­лон “Демографи” гэһэн федераль­на түсэлнүүдэй ашаар аргагүй ехэ мүнгэн һомологдоно гээшэ. Тиимэһээ бүхы барилгануудые ходо хинажа байха хэрэгтэй. Буряадай Толгойлогшо Алексей Цыденов үнгэрһэн долоон хоногой эсэстэ ажалай хэр ябуулагдажа байһые шалгажа, 8 сэсэрлигтэ хүрөө.

Стеклозаводто жэлэй эсэстэ сэсэрлиг нээгдэхэ

Улаан-Үдын Стеклозавод һуурин- да 150 һууритай сэсэрлиг баригдана. Эндэхи олон үхибүүд гэрһээнь холо оршодог сэсэрлигүүдтэ ошохо баа­тай болоно. Зарим түрэлхид бүри хо­тын нүгөө захада хүбүүд, басагадаа шэрэн абаашана.

Шэнээр баригдаһан сэсэрлиг Улаан-Үдэ хотын түбтэ оршодог 52- дохи сэсэрлигэй филиал болохоор ха­раалагданхай. Тиимэһээ һургуулиин наһа гүйсөөгүйшүүлэй болбосоро­лой энэ гуламтын хүмүүжүүлэгшэд болон багшанарай барилгын тал­майда ерэһэниинь гайхалгүй.

Стеклозавод һууринай ажаһуугша Любовь Самаринагай онсолһоор, гэртээ дүтэхэнэ үхибүүгээ сэсэрлиг­тэ ябуулаа һаа, ехэ һайн байгаа.

- Бидэ гэр бүлөөрөө ажалтайб­ди. Үхибүүдыемнай хүгшэн эжынэр харалсана. Наһатай болонхой хадаа, тэдэ ехээр эсэнэ, үхибүүдтэй һуухань хүшэр ха юм, - гэжэ Любовь Самари­на Буряадай Толгойлогшодо дуул­гаа.

Барилгашадай хэлэһээр, барилга апрель һарада эхилээ. Тэдэ декабрь соо сэсэрлигые ашаглалгада тушаа­ха һанаатай.

Сотниководо барилга ехэ түргөөр ябана

Үнинэй хүлеэгдэһэн сэсэрлиг Сотниково һууринда баригдажа эхилэнхэй. Эндэ “Рябинка” сэсэрлиг хүдэлбэшье, бүхы үхибүүдые багта­аха аргагүй. Юуб гэхэдэ, һүүлэй мэ­дээгээр 850 гаран хүүгэд ээлжээндэ байна. Үдэр бүри ута боложо байһан ээлжээн олон хүнүүдэй иишээ нүүжэ ерэдэгтэй холбоотой бшуу.

Сотниково һууринай ажаһуугша Баирма Лосолова Алексей Цыденов­тэ баяр хүргөө. Шэнэ сэсэрлиг хара­хаяа олон хүн суглараа, тэдэ булта хүхижэ байһанаа мэдүүлнэ.

Мүн барилгашад ажалаа түргөөр ябуулжа байһанаа, Буряадай Толгой­логшодо харуулаа. Барилгын удари­дагша Бато Сандаковой хэлэһээр, сентябрь һарын һүүл багаар сэсэр­лиг ашаглалгада тушаагдаха юм. Алексей Цыденов энээндэнь ур­машажа, барилгашаниие магтаа. Һүүлэй байдалаар эндэхи дүрбэн байшанай хоёрдохи дабхарнуудые барилгашад түгэсэжэ байна.

Барилгын ажал саг болзор соогоо ябуулагдана

Мүнөө үедэ олонхи хүүгэд хүгшэдэйнгөөл харууһан доро байна

Хойто-Бэедэ һургуулишье, сэсэрлигшье бодхоогдохо

Ивалга аймагай Хойто-Бэе һууринда һургуули болон сэсэрлиг һаял баригдажа эхилээ. Байшанууд доро­хи газарынь лэ малтагдаад байна. Иимэ байдалтай дайралдаһан Буря­адай Толгойлогшо уурлажа, барил­гашадта ажалаа түргэдүүлхыень зууршалаа.

Хойто-Бэедэ ажаһуугшадай тоо үдэр бүри гэхээр олошорно: бүхы аймагуудһаа хүн зон иишээ нүүжэ ерэнэ. Эндэхи фельдшерэй ба акуше­рэй байшанай хүдэлмэрилэгшэдэй һүүлэй мэдээгээр, мүнөө үедэ Хой­то-Бэедэ һургуулиин наһа хүсөөгүй 1 мянга 500 гаран хүүгэд тоолог­доно. Тиимэһээ эндэ сэсэрлиг бо­лон һургуули бариха болоһониинь һайшаалтай. Юуб гэхэдэ, эгээл дүтын Сокол болон Аэропорт һууринуудай һургуули ба сэсэрлигүүдтэ эндэ­хи хүбүүд, басагадые абанагүй. Түрэлхид үхибүүдээ Доодо Ивалга, Ивалга, Сотниково абаашажа һур- гаха баатай болоно.

Бүхы байдалтай танилсаһан Алексей Цыденов һанамжаараа ху­баалдаа.

“Горхо хараагүй аад, гуталаа бү тайла” гэжэ дэмы хэлэдэггүй ааб даа. Тиимэһээ бүхы барилгануудаа түгэсөөд, хинан шалгадаг албануу­дай тобшолол абаһанайнгаа һүүлдэ баярлахабди. Харин мүнөө ажал ябуулагдаһан зандаа. Хүлеэел даа, - гэжэ Алексей Цыденов хэлээ.

2021 оной түгэсэтэр үшөө 24 хүүгэдэй сэ­сэрлиг баригдаха. Шэнэ сэсэрлигүүдтэ 5 мянган 600 һуури хараалагданхай. Энэ хэрэгтэ 6,3 миллиард түхэриг һомологдохо.

2 һаратайһаа 3 наһатай болотор үхибүүдэй яба­ха гурбан сэсэрлиг ганса Улаан-Үдэдэ бодхоогдохо. Улаан-Үдын түбэй Калан­даришвилиин гудамжаар, мүн Бурвод болон Энерге­тик һууринуудта баригдаха­ар түсэблэгдэнхэй. Гадна Ярууна аймагай Нарһата, Улаан-Үдын Дивизион­ный болон Забайкальский һууринуудта, Ивалгын Гүрэльбэ, Загарай айма­гай Эрхирэг һууринуудта сэсэрлигүүд баригдаха юм.

Һургуулинуудта гурбадахи хала­аниие усадхахын тула баһа ехэ ажал хэгдэнэ. Тарбагатай аймагай Доодо Саянта, Кабанскын Клюевка, Ивал­гын Хойто-Бэе болон Поселье, Зага­рай аймагай Доодо Тайлсы, Түнхэнэй Аршаан һууринуудта барилга эхилээ. Улаан-Үдын 33-дахи гимназида, 49- дэхи болон 25-дахи һургуулинуудай дэргэдэ шэнэ байшанууд бодхоогдо­хо. Тиихэдэ 40-дэхи һургуули шэнээр баригдаха.

Буряадай Толгойлогшо Алексей Цыденовэй хэлэһээр, бүхы зорилго­нууднай бэелүүлэгдэжэ, үхибүүднай һайн оршон байдалда эрдэм мэдэсэ­еэ дээшэлүүлхэнь болтогой.

Борис БАЛДАНОВАЙ гэрэл зурагууд